Stuhi dhe reshje të forta në Michigan në fillim të javës, rrezik për breshër dhe erëra të fuqishme

Michigan pritet të përballet me një përkeqësim të ndjeshëm të motit në fillim të javës, ndërsa një sistem i fuqishëm stuhish do të sjellë reshje të dendura, erëra të forta dhe rrezik për breshër në pjesë të ndryshme të shtetit.

Sipas meteorologëve të National Weather Service, stuhitë do të nisin të hënën në mbrëmje dhe do të vazhdojnë gjatë natës deri në mëngjesin e së martës. Në disa zona, veçanërisht në Michiganin verior, parashikohet edhe shi i ngrirë, ndërsa në pjesën perëndimore kërcënimi kryesor mbetet breshëri i fortë dhe erërat e fuqishme.

Autoritetet paralajmërojnë se reshjet e dendura dhe breshëri mund të ndikojnë drejtpërdrejt në qarkullimin e mëngjesit të së martës, duke krijuar kushte të vështira në rrugë.

Rreziku më i madh për mot të ashpër pritet nga e hëna në mbrëmje deri të martën, kur stuhitë mund të përfshijnë një pjesë të madhe të shtetit. Parashikimet flasin për mundësi të stuhive të forta, reshje intensive dhe erëra dëmtuese, ndërsa nuk përjashtohet as mundësia e ndonjë tornadoje të izoluar në zonat jugore.

Temperaturat do të rriten ndjeshëm të martën, duke arritur deri në 20-21°C në jug të shtetit, çka do të favorizojë zhvillimin e mëtejshëm të stuhive gjatë pasdites dhe mbrëmjes, teksa një front i ftohtë përshkon rajonin.

Në disa zona mund të regjistrohen më shumë se 25 mm reshje brenda 24 orëve, duke rritur rrezikun për përmbytje të përkohshme.

Pas kalimit të frontit të ftohtë, temperaturat do të bien ndjeshëm të mërkurën, me maksimumet që pritet të zbresin në rreth 5-10°C. Në pjesën veriore të Michiganit mund të shfaqen edhe reshje bore me efekt liqenor, megjithëse pa akumulime të mëdha.

Autoritetet u bëjnë thirrje qytetarëve të ndjekin përditësimet e motit dhe të jenë të kujdesshëm gjatë udhëtimeve, veçanërisht gjatë orëve të para të së martës, kur pritet kulmi i motit të keq.