Trump reagon pas debatit: Rogers “e shkatërroi” El-Sayed-in, pretendon presidenti

Presidenti Donald Trump u shpreh të premten se kandidati republikan për Senatin e SHBA-së nga Michigani, Mike Rogers, e “shkatërroi” rivalin demokrat Abdul El-Sayed në debatin televiziv të së enjtes, siç njofton Fox News.

Në një postim në Truth Social, të publikuar pak pas mesnatës së të premtes, Trump e përshkroi Rogers-in si “një patriot të madh amerikan dhe kandidatin republikan për Senatin e SHBA-së nga Michigani”, duke deklaruar se debati ishte kaq i njëanshëm sa “po të kishte qenë ndeshje, do ta kishin ndalur”.

Në të njëjtin postim, presidenti u rikthye edhe te sulmet personale ndaj El-Sayed-it, të cilin e quajti sërish “Mohammad” — një emër që kandidati demokrat e ka korrigjuar publikisht, duke theksuar se emri i tij është Abdul — dhe lëshoi akuza të ashpra ideologjike kundër tij.

Sulmi i së premtes vjen vetëm një ditë pas një tjetër postimi të fortë të Trumpit, të mërkurën në mbrëmje, ku ai e cilësoi El-Sayed-in “kandidat të tmerrshëm për demokratët” dhe “ekstremist radikal”, duke riafirmuar “mbështetjen e tij totale” për Rogers-in.

Kandidati demokrat u kundërpërgjigj të enjten, duke deklaruar se “ai e di që emri im është Abdul. E thotë çdo ditë. Por ai nuk sulmon vetëm mua. Ai sulmon të gjithë ne”, dhe duke akuzuar presidentin se po e përdor emrin dhe fenë e tij për të shpërqendruar votuesit nga, siç tha, “vuajtjet që politikat e tij po u shkaktojnë njerëzve në pompë, në dyqanin ushqimor dhe në zyrën e mjekut”.

Debati i së enjtes ishte përballja e parë televizive mes dy rivalëve për vendin e Michiganit në Senat. Gjatë tij, të dy kandidatët u përplasën ashpër për Izraelin, Iranin dhe financat personale, sipas raportimeve të Fox News.

Trump e ka mbështetur Rogers-in, ish-anëtar i Dhomës së Përfaqësuesve nga viti 2001 deri në 2015, edhe në garën e vitit 2024, kur republikani humbi ndaj demokrates Elissa Slotkin.