Piktura e Churchill-it e dhuruar të bijës del në ankand: «Amaryllis Lily» vlerësohet 300.000–500.000 sterlina në Christie’s

Një pikturë e vitit 1948 nga ish-kryeministri britanik Winston Churchill, “Amaryllis Lily”, do të dalë në ankand në Christie’s në Londër më 21 tetor, si pjesë e mbrëmjes “Modern British and Irish Art”, me vlerësim 300.000–500.000 sterlina (rreth 396.000–661.000 dollarë), siç njofton USA Art News.

Natyrën e qetë që përshkruan një amarilis të kuq të lulëzuar në vazo, mbi një sfond të errët, Churchill ia dhuroi fillimisht të bijës së tij, Lady Mary Soames, e cila e dhuroi më tej për Fondacionin “Churchill Fellowship” në vitin 1995. Të ardhurat nga shitja do të mbështesin programin “Making Space for the Arts” të fondacionit.

Pippa Jacomb, përgjegjësja e mbrëmjes së shitjeve të artit britanik modern në Christie’s, e përshkruan pikturën si “një shembull mbresëlënës të aftësive të Churchill-it si piktor”, që tregon njohurinë e tij të sofistikuar për ngjyrën dhe kompozimin. Sipas saj, vepra pasqyron ndikimin e rëndësishëm të William Nicholson, veçanërisht në kompozimin e përmbajtur dhe përdorimin e guximshëm të ngjyrës.

Pasioni i Churchill-it për pikturën lindi në vitet 1930, pas miqësisë me Nicholson, që u bë mentori i tij; në një letër dërguar historianit të artit John Rothenstein, Churchill e quante atë “personin që më mësoi më shumë për pikturën”. Të dy pikturonin shpesh në Chartwell Manor, rezidencën familjare në Kent, ku në kopsht ishte ndërtuar edhe një studio.

Rekordi i Churchill-it në ankand daton në vitin 2021, kur Christie’s shiti “Tower of the Koutoubia Mosque” (1943) për 8.29 milionë sterlina.