KIEV – Dëmtime në ambasadën holandeze pas një sulmi rus
– Ambasada e Holandës në Kiev është dëmtuar sot, pasi një predhë goditi zonën pranë ndërtesës diplomatike, sipas Euronews.
Ministri i Jashtëm holandez, Tom Berendsen, konfirmoi se shpërthimi shkaktoi dëme të lehta në godinën e ambasadës, ndërsa të gjithë punonjësit janë jashtë rrezikut.
Sipas raportimeve, nga sulmi u thyen xhamat e ndërtesës, u dëmtuan disa automjete dhe një postë sigurie.
Në ambasadë punojnë rreth 40 persona, përfshirë diplomatë holandezë dhe punonjës vendas, por asnjëri prej tyre nuk u plagos.
Ministri i Jashtëm ukrainas, Andrii Sybiha, deklaroi se ambasada u godit gjatë një sulmi rus ndaj kryeqytetit dhe bëri thirrje për dënimin ndërkombëtar të sulmeve ndaj misioneve diplomatike.
Ndërkohë, ministri holandez i Mbrojtjes, Derk Boswijk, tha se incidenti përforcon nevojën për të vazhduar mbështetjen ushtarake ndaj Ukrainës.
Ngjarja ndodh në një periudhë tensionesh të shtuara, vetëm dy ditë pas sulmit ukrainas ndaj Urës së Krimesë, për të cilin Moska ka kërkuar hakmarrje.
Në të njëjtën ditë, Kievi u përball me sulme masive me dronë në disa zona të qytetit, ku sipas kryebashkiakut Vitali Klitschko, u plagosën katër persona./ /Ad.Ab./ a.jor.