Sulmet masive drejt Moskës, kërcënon Rusia: Britania do të paguajë për furnizimin e Ukrainës me dronë
Rusia ka akuzuar Britaninë e Madhe se po “zgjedh qëllimisht përshkallëzimin e krizës në Ukrainë”, pas konfirmimit se dronë të prodhuar në Britani janë përdorur në sulmet ndaj objektivave në Rusi.
“Duke vepruar kështu, Mbretëria e Bashkuar po bëhet bashkëpunëtore dhe bashkëpërgjegjëse për krimet e përgjakshme dhe sulmet terroriste”, shkroi Ambasada Ruse në Britani në një deklaratë.
“Veprimet e Londrës do të sjellin në mënyrë të pashmangshme pasoja, për të cilat ajo do të duhet të përgjigjet”, thuhej më tej, duke shtuar se sa më shumë të përfshihet Britania në konflikt, “aq më i lartë do të jetë çmimi që do të paguajë”.
Në përgjigje, një zëdhënës i Ministrisë së Mbrojtjes britanike tha se Britania qëndronte “krah për krah” me Ukrainën.
“Rusia nuk duhet të ketë asnjë dyshim për vendosmërinë e kësaj qeverie për t’i bërë ballë agresionit rus, në Ukrainë dhe kundër Britanisë së Madhe dhe aleatëve tanë”, tha zëdhënësi.
Britania, shtoi ai, është “e angazhuar për t’i siguruar Ukrainës pajisjet që i nevojiten për t’u mbrojtur nga pushtimi i paligjshëm i Presidentit rus Vladimir Putin”.
Paralajmërimi vjen në një kohë kur Rusia dhe Ukraina kanë shkëmbyer një tjetër valë sulmesh gjatë natës së të hënës dhe të martës.
Dronët në fjalë, të prodhuar nga dy kompani të ndryshme britanike, janë përdorur brenda territorit rus për goditjen e objektivave ushtarake dhe industriale, përfshirë rafineritë dhe magazinat e kompanisë së shitjeve online Wildberries.
Ukraina ka goditur vazhdimisht kompaninë, e njohur si versioni rus i Amazon, dhe thotë se shtatë nga 10 qendrat më të mëdha logjistike të Wildberries janë “nxjerrë jashtë funksionit”.
Një burim ushtarak konfirmoi se dronët britanikë janë përdorur në këto sulme, të cilat dyshohet se kanë shkaktuar më shumë se 35 miliardë paund dëme ekonomike.
Rusia nisi pushtimin në shkallë të plotë të Ukrainës në shkurt 2022 dhe aktualisht kontrollon rreth një të pestën e territorit ukrainas.
Zëdhënësja e Ministrisë së Jashtme ruse, Maria Zakharova, tha se dronë me komponentë dhe konfigurime britanike janë përdorur për të sulmuar territorin rus, përfshirë një depo karburanti në distriktin Kamensky të rajonit të Rostovit.
Paralajmërimi i Moskës ndaj Britanisë vjen pas një vale sulmesh ukrainase ndaj Rusisë.
Në sulmet e fundit gjatë natës, zyrtarët rusë thanë se rreth 620 dronë ishin drejtuar drejt rajonit përreth Moskës. Mbrojtja ajrore ruse rrëzoi më shumë se 180 prej tyre, ndërsa disa persona u plagosën, sipas autoriteteve.
Një magazinë e Wildberries pranë Moskës u godit dhe zjarri në objekt është shuar, tha guvernatori rajonal Andrey Vorobyov.
Në një deklaratë, kompania tha se një kompleks logjistik kishte pësuar “dëme të lehta” nga sulmi.
Në Ukrainë, të paktën dy persona u vranë dhe katër të tjerë u plagosën nga sulmet ruse në Zaporizhzhia, tha guvernatori rajonal Ivan Fedorov. Sipas tij, Rusia kreu 1,158 sulme ndaj 59 vendbanimeve në rajon gjatë 24 orëve të fundit.
