Sulm me dron rus në Kryvyi Rih: qendër tregtare goditet, 15 të vdekur
Një sulm me dron rus goditi të premten një qendër tregtare në Kryvyi Rih, qytetin e lindjes së presidentit Volodymyr Zelenskyy, duke shkaktuar të paktën 15 të vdekur dhe një numër të madh të plagosur.
Siç raporton CBS News, sulmi në qendrën tregtare së bashku me dy sulme të tjera në rajonet e Mykolaivit dhe Kharkivit shkaktuan gjithsej 21 viktima në të gjithë Ukrainën gjatë të njëjtës ditë. Kreu i administratës ushtarake të rajonit Dnipropetrovsk, Oleksandr Hanzha, tha se në Kryvyi Rih humbën jetën të paktën 15 persona dhe u plagosën 130, përfshirë 23 fëmijë. Presidenti Zelenskyy e përshkroi goditjen si një sulm “double-tap”, me valën e dytë që goditi ndërsa ekipet e shpëtimit po punonin, dhe e quajti aktin një mizori, duke paralajmëruar se Ukraina do të përgjigjet.
Në rajonin e Kharkivit autoritetet thanë se dy gra, 73 dhe 66 vjeçe, u vranë dhe dy të tjerë u plagosën. Një sulm tjetër në rajonin e Mykolaivit la katër të vrarë, përfshirë tre fëmijë, njoftuan shërbimet e emergjencës. Forcat ajrore të Ukrainës raportuan se gjatë natës neutralizuan ose rrëzuan 107 nga 135 dronat e nisura nga Rusia. Sulmet e mëdha ajrore vazhduan pas një vale të mëparshme që goditi kryeqytetin Kievin dhe la 16 të vdekur vetëm 24 orë më parë.
Autoritetet ukrainase gjithashtu raportuan sulme me dron brenda territorit rus: një goditje në rajonin e Belgorodit vrau një person dhe plagosi katër të tjerë kur u godit një makinë, ndërsa zyrtarë ukrainas thanë se një rafineri në Perm dhe baza ajrore në Volgograd u prekën nga goditje të tjera. Media lokale ruse dhe Ministria e Mbrojtjes së Rusisë raportuan se mbrojtja ajrore ruse interceptoi qindra dronë — një deklaratë që vjen ndërsa të dyja palët po shtojnë përdorimin e pajisjeve fluturuese me rreze të gjatë.
Sipas CBS News, përshkallëzimi i sulmeve ajrore dhe me dron pasqyron intensifikimin e konflikteve dhe rritjen e rrezikut për civilët, ndërsa autoritetet ukrainase përpiqen që pasojat e luftës t9i ndihen edhe publikut rus dhe të ushtrojnë presion politik; deri tani Kremlini nuk ka treguar shenja se do të tërhiqet nga vijat e saja të politikës së agresionit.
