SHBA fundosin stacionin e dytë lundrues të furnizimit që dyshohet se përdorej nga trafikantët e drogës
Shtetet e Bashkuara njoftuan se forcat e tyre ndërhynë dhe fundosën një anije që dyshohet se po funksiononte si stacion furnizimi lundrues për të mbështetur trafikimin e drogës në Paqësorin lindor. Ngjarja vjen pas një operacioni të ngjashëm të premten, kur u shkatërrua një anije tjetër e lidhur me organizatën kriminale ekuadoriane Los Choneros.
Siç raporton CBS News, Komanda Jugore e Shteteve të Bashkuara (SOUTHCOM) njoftoi se forcat e saj ndërhynë në një anije që vepronte si “stacion furnizimi lundrues” në ujëra ndërkombëtare dhe se anija u kontrollua pa incidente; personat në bord u dorëzuan te autoritetet e Ekuadorit. Materiale të publikuara nga SOUTHCOM shfaqin pamje të paqarta ku shihet disa të armatosur duke hipur në një anije, e cila më pas u shkatërrua.
SOUTHCOM tha se operacioni u zhvillua në koordinim dhe bashkëpunim me qeverinë e Ekuadorit. Komandanti i Komandës Jugore, gjenerali Francis L. Donovan, theksoi se ndërhyrja synonte të priste një nyje kyçe në zinxhirin logjistik të trafikantëve dhe të dobësonte rrjetet që përdoren për transportin e drogës në Perëndim të Hemisferës.
Në portin e Mantës familjarë të peshkatarëve thanë se kishin humbur kontaktin me të afërmit pas largimit të anijes për një udhëtim peshkimi të premten. Olivia Holguin, motra e kapitenit të anijes, u shpreh për Agjencinë Franceze të Lajmeve se: “Janë peshkatarë, luftojnë për të sjellë ushqim në shtëpitë tona. Ne duam përgjigje, duam të dimë nëse janë mirë.” AFP nuk ka mundur të verifikojë nëse anija për të cilën flasin familjarët është e njëjta që u godit nga forcat amerikane.
Sipas CBS News, ky veprim bëhet pjesë e operacionit të nisur rreth një viti më parë me emrin “Southern Spear”, për të goditur rrjetet e trafikut të drogës; që nga atëherë, sipas një bilanci të AFP, më shumë se 200 persona janë vrarë gjatë goditjeve në Detin Karaibe dhe Paqësor. Autoritetet amerikane nuk kanë paraqitur prova përfundimtare që lidhin çdo anije të goditur me trafikimin e drogës, ndërsa Ekuadori ka theksuar bashkëpunimin e tij me SHBA në përpjekjet kundër trafikut dhe dhunës.
