Debat në Kapitol për projektligjet që kërkojnë licencimin e tregtarëve të armëve në Michigan
Ligjvënësit e Michiganit po shqyrtojnë dy projektligje që synojnë të rregullojnë tregtinë me armë në nivel shtetëror. SB 583 kërkon që pronarët e dyqaneve të armëve të marrin një licencë shtetërore për çdo vendndodhje ku shesin armë, ndërsa SB 584 parashikon rregulla për mënyrën e ruajtjes së armëve në dyqanet me pakicë. Çështjet u diskutuan gjatë dëshmisë para Komisionit të Senatit për të Drejtat Civile, Gjyqësinë dhe Sigurinë Publike.
Në dëshminë e mbajtur të martën para komisionit, sipas michiganpublic, u përplasën përfaqësues të grupeve për kontrollin e armëve dhe mbrojtës të të drejtave mbi pronësinë. Nick Buggia i National Rifle Association argumentoi se tregtarët e armëve janë tashmë nën licencim federal dhe se projektligjet do të shtonin rregulla dhe pengesa burokratike për shitjen dhe posedimin ligjor të armëve. Nga ana tjetër, aktivistët për kontrollin e armëve vunë në dukje se prerjet buxhetore gjatë administratës së mëparshme kanë dobësuar mbikëqyrjen federale; Marianna Mitchem nga Everytown for Gun Safety tha se në fazën e shpërndarjes nga prodhuesit tek tregtarët, disa shitës jopërgjegjës injorojnë sinjalet paralajmëruese dhe lehtësojnë tregtinë e paligjshme që përfundon tek trafikantë dhe kriminelë.
Kryetarja e komisionit, senatoren Stephanie Chang (D-Detroit), tha se pritet një votim mbi këto projektligje në javët e ardhshme. Aktualisht 15 shtete kërkojnë në një formë ose tjetër licencimin e tregtarëve të armëve, përfshirë Indiana, Illinois dhe Alabama, raporton michiganpublic.
