Gjykata Supreme e Michiganit i kthen rastin e vrasësit të shkollës së Oxfordit në apel

Gjykata Supreme e Michiganit i ka dhënë vrasësit të shkollës së mesme të Oxfordit një mundësi të re për të provuar se nuk duhej të dënohej me burgim të përjetshëm pa të drejtë lirimi për vrasjen e katër nxënësve.

Me një urdhër të datës 17 shtator, Gjykata Supreme e ktheu rastin e Ethan Crumbley-t në Gjykatën e Apelit të Michiganit për të rishikuar disa çështje, përfshirë: nëse avokati i tij kishte qenë joefektiv; nëse gjykatësi kishte abuzuar me diskrecionin duke konkluduar se prokuroria kishte sjellë prova të mjaftueshme për dënimin maksimal; dhe nëse deklaratat e tij gjatë shqiptimit të dënimit ia kishin hequr të drejtën e apelimit.

Gjykata, megjithatë, nuk pranoi ta kthente rastin në gjykatën e shkallës së parë.

Crumbley u deklarua fajtor në tetor të vitit 2022 dhe u dënua me burgim të përjetshëm pa të drejtë lirimi për masakrën që u mori jetën katër nxënësve: 16-vjeçarit Tate Myre, 17-vjeçarëve Madisyn Baldwin dhe Justin Shilling, dhe 14-vjeçares Hana St. Juliana. Gjashtë nxënës të tjerë dhe një mësuese u plagosën. Armën ia kishin blerë prindërit si dhuratë të hershme Krishtlindjesh.

Prokuroria ka argumentuar se dënimi maksimal është i përshtatshëm, pasi Crumbley pranoi gjithçka, duke rrëfyer synimin për të shkaktuar panik dhe duke e detajuar planin në ditarin e tij një ditë para ngjarjes: “Do të shkaktoj të shtënat më të mëdha në një shkollë në historinë e Michiganit. E kam humbur plotësisht mendjen.”

Avokatët mbrojtës argumentojnë se ai meriton një ditë mundësinë e lirisë, duke pasur parasysh moshën dhe problemet e shëndetit mendor. Avokatja Jaqueline Ouvry, nga Zyra Shtetërore e Mbrojtjes në Apel, tha se për shkak se u deklarua fajtor, çështjet e tij ligjore “nuk kanë marrë kurrë një rishikim të plotë apeli”.

Prokurorja e Oakland County-t, Karen McDonald, tha në një deklaratë të premten, më 18 shtator, se e mbron vendimin për dënimin më të ashpër të mundshëm: “Dënimet me burgim të përjetshëm pa të drejtë lirimi për të miturit janë jashtëzakonisht të rralla dhe duhet të jepen vetëm në rastet më serioze… Të shtënat në shkollën e Oxfordit janë një rast i tillë.”

Vendimi vë nën lupë vendimet e gjykatësit Kwame Rowe të Gjykatës së Qarkut të Oakland County-t, i cili drejtoi deklarimin fajtor dhe shqiptoi dënimin pas dëshmive emocionale të prindërve të viktimave.

Prindërit e Crumbley-t, James dhe Jennifer Crumbley, u bënë prindërit e parë në Amerikë të mbajtur penalisht përgjegjës për një masakër shkollore të kryer nga fëmija i tyre. Ata u dënuan për vrasje të pavullnetshme dhe po vuajnë dënime me 10 vjet burg. Edhe ata e kanë apeluar vendimin.

Burimi: Detroit Free Press