Rënie e rasteve të hepatitit C në Michigan, por sëmundja nuk është ende e zhdukur
Në planin global, Egjipti u bë vendi i parë që në 2024 shpalli eliminimin e hepatitit kronik C si kërcënim për shëndetin publik pas një fushate masive; Anglia dhe Australia janë afër këtij qëllimi, sipas Organizatës Botërore të Shëndetësisë. Megjithatë, në Shtetet e Bashkuara vazhdon të ndodhë një sfidë e madhe, me rreth 11,000 vdekje në vit nga një sëmundje që ka qenë e shërueshme për rreth një dekadë.
Sipas michiganpublic, në Michigan numri i rasteve kronike të hepatitit C ka rënë ndjeshëm — nga rreth 10,000 në 2018 në pak më shumë se 3,000 në 2022 — një ulje që autoritetet shëndetësore e cilësojnë si përparim të rëndësishëm, duke pasur parasysh se simptomat shpesh shfaqen pas shumë vitesh.
Drejtoresha mjekësore e shtetit, Dr. Natasha Bagdasarian, tha se rezultatet janë të rëndësishme dhe të arritshme vetëm përmes përpjekjeve të koordinuara. Ajo paralajmëroi se hepatiti C kronik mund të çojë në komplikacione serioze, si kancer hepatocelular, cirrozë e mëlçisë dhe nevojë për transplant, ndërsa shumë të prekur nuk e dinë se janë infektuar për shkak të periudhës së gjatë pa simptoma.
Infektimi përhapet përmes kontaktit me gjak të infektuar — për shembull duke ndarë gjilpëra për përdorim droge, përmes tatuazheve ose piercingjeve në kushte jo sterile, aksidenteve me gjilpëra në mjedise shëndetësore, dhe më rrallë nga nënë te foshnja gjatë lindjes ose përmes marrëdhënieve seksuale me rrezik të lartë. Shteti ka adresuar problematikën me programin “We Treat Hep C”, i cili bashkëpunon me organizata komunitare për të rritur testimin dhe kapjen e rastëve. Michigan gjithashtu ka negociuar çmime të ulëta për medikamentin Mavyret, që shëron hepatitin C me një kurë tetëjavore; pa sigurim, kostoja jashtë xhepit është mbi 16,000 dollarë (rreth 12,000 dollarë përmes planit të zbritjes GoodRx), por për personat me Medicaid me të ardhura të ulëta ka një pagesë nominale 1 dollar dhe programi Healthy Michigan nuk kërkon copay.
Bagdasarian theksoi se sistemi i fragmentuar i kujdesit shëndetësor në SHBA pengon përpjekjet për eliminimin e sëmundjes: ka njerëz që nuk plotësojnë kriteret për Medicaid por nuk mund të përballojnë sigurime të tjera, ose që humbin mbulimin shëndetësor pas humbjes së punës. Numrat paraprakë tregojnë gjithsesi përmirësim të mëtejshëm në nivel shtetëror, me raste të reja të identifikuara nën 2,000 në 2025, raporton michiganpublic.
