Poloni, neonazistët akuzohen për planifikimin e sulmeve ndaj xhamisë dhe shkollës

Një i ri po përballet me akuza të rënda në Poloni për dyshime se është i lidhur me qarqet neonaziste dhe për përgatitjen e sulmeve që synojnë një shkollë dhe një xhami, sipas autoriteteve polake.

Prokurorët njoftuan se Pawel G., një shtetas polak i lindur në vitin 2009 dhe mbiemri i të cilit nuk mund të bëhet publik për shkak të legjislacionit për mbrojtjen e të dhënave, u arrestua të premten.

Arrestimi i tij pasoi ato të dy 16-vjeçarëve, me të cilët, sipas Shërbimit të Sigurisë së Brendshme Polake (ABW), ai mbante kontakte online përmes komuniteteve ekstremiste dhe neonaziste në platformat Telegram dhe Discord.

Sipas ABW, i riu mori pjesë në diskutime online rreth sulmeve të mëparshme terroriste si dhe mënyrës se si kishin vepruar autorët e tyre.

“Ai mori pjesë në diskutime rreth sulmeve terroriste të kaluara dhe autorëve të tyre . Disa biseda kishin të bënin edhe me planifikimin e sulmeve të mundshme . Pjesëmarrësit analizuan metodat e përdorura nga terroristët dhe i trajtuan autorët si burime frymëzimi”, tha shërbimi polak i sigurisë.

Ministri i Drejtësisë i Polonisë, Waldemar Zurek, tha se objektivat e mundshme përfshinin një xhami dhe një shkollë .

“Nuk ka dhe nuk do të ketë tolerancë për fashizmin , urrejtjen apo planifikimin e sulmeve të përgjakshme në Poloni”, shkroi ai në një postim në X.

Pavel G. përballet me një dënim që mund të arrijë deri në 15 vjet burg.

Dy 16-vjeçarët e tjerë që u arrestuan më parë janë dërguar në qendrat e paraburgimit për të mitur .

ABW kishte njoftuar se hetimi ka të bëjë me një mjedis online në të cilin qarkullonte propagandë neonaziste , përmbajtje që glorifikonte dhunën dhe materiale që lidheshin me sulme terroriste dhe vrasje masive . Autoritetet po shqyrtojnë gjithashtu se si u radikalizuan personat e përfshirë dhe rrjetin e kontakteve të tyre.