Hungaria dhe Ukraina përplasen për forumin e ri të Zelenskyyt
Një nismë e re e presidentit ukrainas Volodymyr Zelensky ka rikthyer tensionet mes Ukrainës dhe Hungarisë. Zelenskyy prezantoi nismën C8, si një format të ri bashkëpunimi mes vendeve të rajonit, me fokus te siguria, energjia, tregtia dhe investimet.
Në listën e vendeve pjesëmarrëse u përfshi edhe Hungaria. Por kryeministri Péter Magyar deklaroi se Budapesti nuk ka pranuar t’i bashkohet nismës. Sipas tij, Hungaria ishte ftuar, por e kishte refuzuar pjesëmarrjen dhe përfshirja e vendit në këtë format pa miratimin e qeverisë është e papranueshme. Hungaria u përfaqësua në samit nga një diplomat, por nuk ishte mes nënshkruesve të deklaratës përfundimtare.
Ministri i Jashtëm ukrainas Andrii Sybiha reagoi duke akuzuar qeverinë hungareze se po vazhdon atë që ai e përshkroi si politikë penguese dhe izoluese të ish-kryeministrit Viktor Orbán. Kievi, megjithatë, deklaroi se mbetet i hapur për bashkëpunim pragmatik me Budapestin.
Përplasja vjen vetëm pak muaj pas ndryshimit të qeverisë në Hungari dhe përpjekjeve fillestare për përmirësimin e marrëdhënieve me Ukrainën.
Tensionet janë shtuar edhe për çështjet energjetike, ndërsa marrëdhëniet mes dy vendeve vazhdojnë të ndikohen edhe nga mosmarrëveshjet për të drejtat e minoritetit hungarez në Ukrainën perëndimore. Forumi C8 u lançua më 18 shtator dhe synon të krijojë një mekanizëm më të gjerë bashkëpunimi mes vendeve të Europës Qendrore dhe Lindore.
