Iku nga agjentët e ICE në Grand Rapids, vdes pasi makina përplaset me pemë dhe merr flakë

GRAND RAPIDS — Një burrë ka humbur jetën të dielën në mëngjes pasi u përpoq t’i ikte me makinë agjentëve të Shërbimit të Imigracionit dhe Doganave (ICE) në Grand Rapids, njoftoi të martën Policia e Grand Rapids (GRPD), sipas Detroit Free Press.

Ngjarja ndodhi rreth orës 7:10 të mëngjesit të së dielës, më 20 shtator, pranë kryqimit të Century Avenue SW dhe McKendrick Street SW. Sipas policisë, makina doli nga rruga, u përplas me një pemë dhe më pas u përfshi nga flakët. Drejtuesi, i cili ishte i vetmi në makinë, u gjet i vdekur në vendngjarje.

“Agjentët e ICE u përpoqën ta ndalonin mjetin dhe drejtuesi iku” përpara përplasjes, tha GRPD në një deklaratë. Policia e qytetit theksoi se nuk kishte pasur asnjë përfshirje apo dijeni për këtë operacion federal përpara se të thirrej në vendin e aksidentit.

Shefi i Policisë së Grand Rapids, Joseph Trigg, njoftoi se i ka kërkuar Policisë Shtetërore të Michiganit (MSP) të marrë përsipër hetimin e rastit, “për shkak të kompleksitetit të çështjes”. Sipas tij, MSP, “nën drejtimin e guvernatores dhe prokurores së përgjithshme, mund të jetë në pozicion më të mirë për të përcaktuar kornizën kohore dhe çdo rrethanë tjetër potencialisht të rëndësishme, si dhe hapat e ardhshëm që mund të jenë të përshtatshme”.

Kongresmenja demokrate Hillary Scholten, e cila përfaqëson zonën e Grand Rapids në Kongres, e identifikoi viktimën si Mario David Coronado Juarez dhe i dërgoi një letër David Venturella-s, drejtorit në detyrë të ICE, duke kërkuar përgjigje të menjëhershme.

“Asnjë ndalim trafiku nuk duhet të përfundojë me fatalitet. Diçka shkoi keq dhe duhet të dimë çfarë dhe si. I kam dërguar një letër Shërbimit të Imigracionit dhe Doganave duke kërkuar përgjigje të menjëhershme për atë që ndodhi dhe një hetim transparent mbi faktet që ende nuk i dimë, në mënyrë që ta parandalojmë diçka të tillë që të mos ndodhë më kurrë”, tha Scholten në një deklaratë, cituar nga Free Press.

Sipas raportimeve të medias lokale WOOD TV, të afërmit konfirmuan se viktima ishte një emigrant pa dokumente nga Guatemala, i cili kishte jetuar dhe punuar në Grand Rapids për rreth shtatë vjet. Banorët e zonës i thanë WOOD-it se agjentët e ICE ishin të parët që mbërritën në vendngjarje pas aksidentit; një video e regjistruar nga një fqinj tregon disa makina pa shenja dalluese dhe persona me jelekë antiplumb pranë vendit të ngjarjes.

Kongresmenja Scholten u zotua se do ta ndjekë çështjen nga afër: “Qëllimi i organeve federale të zbatimit të ligjit është t’i bëjnë komunitetet tona më të sigurta. Duhet të sigurohemi që kjo është ajo që po ndodh. Do ta ndjek këtë situatë nga afër dhe do të qëndroj në kontakt të vazhdueshëm me organet e zbatimit të ligjit federale dhe lokale derisa komuniteti ynë të marrë përgjigjet që meriton.”

Burimi: Detroit Free Press / WOOD TV (Nexstar)