Trump para takimit me Xi-në: Inteligjenca artificiale do të diskutohet, por duhet të lihet ashtu siç është
UASHINGTON – Presidenti amerikan Donald Trump deklaroi të enjten se inteligjenca artificiale do të jetë “një temë e madhe diskutimi” në takimin e tij me presidentin kinez Xi Jinping, por shtoi se të dy liderët duan t’i lënë gjërat ashtu siç janë.
Në një postim në rrjetet sociale, pak orë para takimit në Shtëpinë e Bardhë, Trump përdori termin e tij të preferuar “Super Intelligence (SI)”: “Një ditë e madhe me presidentin Xi të Kinës. Super Intelligence do të jetë një temë e madhe diskutimi, por dua ta lë pikërisht aty ku është”. “Ky është edhe qëndrimi i Kinës. Mburoja jonë është DOJ!”, shkroi ai, duke iu referuar Departamentit të Drejtësisë së SHBA-së.
Deklarata vjen një javë pasi Trump kishte thënë se Shtetet e Bashkuara kanë tashmë “masa mbrojtëse” për të rregulluar dhe për të ndjekur penalisht kompanitë e inteligjencës artificiale, duke zbutur kështu shqetësimet e drejtuesve të industrisë së teknologjisë për keqpërdorimin e kësaj teknologjie.
Takimi Trump–Xi zhvillohet në kuadër të vizitës 3-ditore të liderit kinez në Uashington. Xi mbërriti dje dhe u prit nga vetë Trump në pistën e aeroportit. Në mbrëmje pritet një darkë shtetërore në Shtëpinë e Bardhë, ku do të marrin pjesë disa prej drejtuesve më të mëdhenj të industrisë së teknologjisë, mes tyre Jeff Bezos, Sundar Pichai, Sam Altman, Tim Cook, Elon Musk, Mark Zuckerberg dhe Jensen Huang.
Më herët këtë javë, sekretari i Thesarit amerikan Scott Bessent dhe zëvendëskryeministri kinez He Lifeng ranë dakord për krijimin e një mekanizmi njoftimi mes dy vendeve për incidentet që lidhen me inteligjencën artificiale – një hap që shihet si përpjekje për të ulur tensionet në garën teknologjike mes Uashingtonit dhe Pekinit.
Burimi: Reuters
