Instituti GAP: Mbi 250 mijë kosovarë morën leje qëndrimi në BE nga viti 2020 deri më 2025

Instituti GAP ka publikuar një tabelë me të dhënat e emigrimit të shtetasve kosovarë në vendet e Bashkimit Evropian, duke treguar një valë të qëndrueshme largimi gjatë gjashtë viteve të fundit.

Sipas të dhënave, vetëm gjatë vitit 2025 leje qëndrimi në shtetet e BE-së morën rreth 44 mijë shtetas kosovarë. Ndërkohë, përgjatë periudhës 2020–2025, mbi 250 mijë kosovarë kanë përfituar leje qëndrimi në Bashkimin Evropian.

Të dhënat tregojnë se rreth 73 për qind e personave që kanë fituar leje qëndrimi në BE janë të moshës deri në 34 vjeç, ndërsa 71 për qind e lejeve të lëshuara kanë pasur kohëzgjatje mbi 12 muaj.

Gjithashtu, rreth 65 për qind e lejeve të qëndrimit për shtetas kosovarë në BE janë lëshuar nga Gjermania. Po ashtu, tabela tregon se gjatë vitit 2025 rreth 10 mijë shtetas kosovarë janë kthyer nga Gjermania në Kosovë.

Emigrimi vijon të mbetet një nga sfidat kryesore shoqërore dhe ekonomike të Kosovës, me ndikim të drejtpërdrejtë në fuqinë punëtore dhe në demografinë e vendit.

Burimi: KosovaPress — https://kosovapress.com/instituti-gap-mbi-250-mije-kosovare-moren-leje-qendrimi-ne-shtete-te-be-se-nga-viti-2020-deri-me-2025