Kurti merr letra urimi për formimin e Qeverisë nga kryeministrat e Maqedonisë së Veriut e Malit të Zi dhe Ambasada e Gjermanisë

Kryeministri i Kosovës, Albin Kurti, ka pranuar letra urimi me rastin e formimit të Qeverisë dhe fillimit të mandatit të ri, siç njofton Qeveria e Kosovës në një komunikatë të shpërndarë sot.

Në mesin e atyre që i kanë dërguar urime Kurtit janë kryeministri i Maqedonisë së Veriut, Hristijan Mickoski, kryeministri i Malit të Zi dhe Ambasada e Gjermanisë në Kosovë, raporton Klan Kosova.

Në letrën e tij të datës 13 shtator 2026, Mickoski e përgëzon Kurtin për rizgjedhjen si kryeministër i Republikës së Kosovës, duke shprehur besimin se dy vendet do të vazhdojnë të ndërtojnë marrëdhënie edhe më produktive përmes dialogut politik dhe bashkëpunimit në ekonomi, infrastrukturë, siguri dhe bashkëpunim rajonal.

Letër urimi ka dërguar edhe ambasadori gjerman në Prishtinë, Rainer Rudolph, i cili më 25 shtator e ka përgëzuar Kurtin për mandatin e ri. Sipas letrës së Ambasadës gjermane, Gjermania e vlerëson Kosovën si partner të rëndësishëm në Ballkanin Perëndimor dhe mbetet e përkushtuar ndaj stabilitetit, reformave dhe së ardhmes evropiane të rajonit.

Në letër theksohet gjithashtu se dialogu i normalizimit me Serbinë, i udhëhequr nga BE-ja, mbetet thelbësor për stabilitetin afatgjatë në Ballkanin Perëndimor, dhe shprehet shpresa që Qeveria e Kosovës të angazhohet për rifillimin e shpejtë të tij dhe të punojë drejt marrëveshjeve praktike e të ndërsjellta të respektueshme.