Apple forcon kontrollin e qasjes “Full Disk Access” në macOS për shkak të rreziqeve nga agjentët e inteligjencës artificiale
Apple ka njoftuar se do të fusë kontrolle shtesë rreth cilësimit “Full Disk Access” në macOS, siç njofton TechCrunch. Ky cilësim i jep një aplikacioni leje të aksesojë skedarët, emailet, mesazhet dhe madje edhe historikun e shfletimit, dhe ishte krijuar fillimisht që aplikacionet e backup-it të funksiononin siç duhet.
Sipas postimit të Apple-it për zhvilluesit, agjentët e inteligjencës artificiale kanë rritur “rreziqet që lidhen me këtë nivel qasjeje”. Përdoruesit që “vërtet duan t’i japin një aplikacioni këtë nivel të jashtëzakonshëm qasjeje” do të mund ta bëjnë këtë vetëm me “veprim shumë eksplicit të përdoruesit”.
Në postimin e saj për zhvilluesit, Apple shkruan: “Disa zhvillues po e përdorin Full Disk Access në mënyra që mund t’i vënë përdoruesit në rrezik, duke ekspozuar gjithçka në sistemet e tyre… pa dijeninë dhe kuptimin e plotë të përdoruesve”.
Shkaku i drejtpërdrejtë i këtij vendimi duket se lidhet me raportimet e fundit: kolumnisti i Inc., Jason Aten, raportoi se aplikacioni Muse i Meta-s në Mac e dinte përmbajtjen e mesazheve të tij private, edhe pse ai pretendon se nuk i kishte dhënë leje agjentit. Meta e mohoi pretendimin. Gjithashtu, një raportim i Wired citoi se një defekt në aplikacionin Mac të ChatGPT mund t’u kishte lejuar hakerëve akses në të dhëna sensitive.
Apple nuk i është përgjigjur kërkesës së TechCrunch për koment, dhe detajet apo koha e hyrjes në fuqi të kontrolleve të reja nuk u bënë publike.
