Benson e quan “të paligjshëm” urdhrin e Trump për votimin me postë

Një përplasje e re politike dhe ligjore po zhvillohet në Michigan, pasi Sekretarja e Shtetit, Jocelyn Benson, ka reaguar ashpër ndaj një urdhri ekzekutiv të nënshkruar nga Presidenti Donald Trump, i cili synon të ndryshojë rrënjësisht mënyrën e votimit me postë në SHBA.

Në një deklaratë të bërë publikisht më 31 mars, Benson e cilësoi urdhrin “të paligjshëm në vetvete” dhe paralajmëroi se do ta sfidojë atë në gjykatë. Ajo theksoi se organizimi i zgjedhjeve është kompetencë e shteteve dhe jo e presidentit.

Urdhri i Trump parashikon krijimin e një liste federale të shtetësisë për çdo shtet, mbi bazën e së cilës do të përcaktohet se kush ka të drejtë vote. Shtetet do të duhet gjithashtu të raportojnë paraprakisht se cilët votues do të votojnë me postë, ndërsa Shërbimi Postar i SHBA-së do të përdorë zarfe me kode të veçanta për të gjurmuar çdo fletë votimi.

Sipas këtij plani, shtetet që nuk zbatojnë kërkesat mund të humbasin financimet federale, ndërsa zyrtarët mund të përballen edhe me ndjekje penale nëse dërgojnë fletë votimi për persona që konsiderohen të papërshtatshëm nga autoritetet federale.

Benson paralajmëroi se një sistem i tillë jo vetëm që është i vështirë për t’u zbatuar në praktikë, por edhe rrezikon të përjashtojë padrejtësisht votues të ligjshëm. Ajo theksoi se nuk ekziston një listë e plotë e qytetarëve amerikanë dhe se lëvizjet e popullsisë, si dhe vdekjet, e bëjnë një sistem të tillë tepër kompleks.

“Nuk është presidenti ai që drejton zgjedhjet, por shtetet. Ky urdhër do ta bëjë më të vështirë votimin për qytetarët e Michiganit dhe do të krijojë kaos në çdo hap të procesit zgjedhor,” deklaroi Benson.

Në zgjedhjet e përgjithshme të vitit 2024, më shumë se 2.2 milionë banorë të Michiganit votuan me postë, duke e bërë këtë metodë një element kyç të procesit zgjedhor në shtet.

Edhe Prokurorja e Përgjithshme e Michiganit, Dana Nessel, reagoi duke e cilësuar urdhrin si një përpjekje të paligjshme për të marrë kompetencat e shteteve. Sipas saj, Kushtetuta amerikane është e qartë se rregullimi i zgjedhjeve i takon shteteve dhe Kongresit, jo presidentit.

“Nuk është në dorën e presidentit të kontrollojë ligjet e votimit në shtete. Asnjë firmë e tij nuk mund t’i japë këtë pushtet,” u shpreh Nessel.

Nga ana tjetër, Trump ka përsëritur për vite me radhë pretendimet për mashtrime të përhapura në votim, sidomos në votimin me postë, edhe pse nuk ka prova që të tregojnë se këto pretendime kanë ndikuar ndonjëherë në rezultatin e një zgjedhjeje kombëtare.

Debati pritet të përfundojë në gjykata, ndërsa çështja mund të ketë pasoja të rëndësishme për mënyrën se si do të zhvillohen zgjedhjet në muajt e ardhshëm në SHBA.