Sot në Prishtinë protestohet kundër kryeministrit Kurti, kërkohet dorëheqja e tij
Sot në Prishtinë do të mbahet protesta e paralajmëruar kundër kryeministrit Albin Kurti, e cila nis në orën 12:00 në Sheshin Skënderbeu, siç njoftojnë mediat kosovare që kanë përcjellë thirrjen e organizatorit.
Organizatori Durim Aliu ka bërë thirrje për pjesëmarrje masive përmes një postimi në Facebook, duke theksuar se protesta nuk organizohet për interesa partiake, por për qytetarët, familjet dhe të ardhmen e Kosovës, siç njofton Gazeta Pa Censurë.
Kërkesa kryesore e protestuesve është dorëheqja e kryeministrit Kurti, e jo vetëm ndryshimi i ministrave. “Albin Kurti, ditët e llogaridhënies kanë ardhur! Nesër nuk dalim për parti, por për qytetarët, për familjet tona dhe për të ardhmen e Kosovës. Nuk kërkojmë ndërrim ministrash. Kërkojmë dorëheqjen e Albin Kurtit!”, kishte shkruar Aliu në thirrjen e tij për protestë.
Aliu u ka bërë thirrje qytetarëve që të marrin pjesë në tubim, duke e përmbyllur mesazhin me sloganin “Republika është e qytetarëve!”. Thirrja për këtë protestë ishte bërë publike që në tetor, kur u raportua se për mbajtjen e saj do të njoftohej edhe Policia e Kosovës, siç kishte njoftuar Indeksonline.
