Zgjedhjet në SHBA, kur priten rezultatet e para dhe cilat gara do të jenë vendimtare?
Miliona amerikanë po votojnë sot në zgjedhjet e mesmandatit, ku do të përcaktohet përbërja e re e Kongresit dhe drejtimi politik i vendit për 2 vitet e ardhshme.
Sipas Associated Press (AP), votuesit do të vendosin për mijëra gara në të gjithë Shtetet e Bashkuara, përfshirë vendet në Dhomën e Përfaqësuesve, Senat dhe postet e guvernatorëve.
Qendrat e para të votimit do të mbyllen në orën 18:00 sipas kohës së bregdetit lindor amerikan, përkatësisht në mesnatë sipas orës evropiane.
Rezultatet e para pritet të vijnë nga Indiana dhe Kentucky, ndërsa vëmendja do të përqendrohet më pas te shtetet ku zhvillohen gara të ngushta ndërmjet republikanëve dhe demokratëve.
Në orën 01:00 të së mërkurës, sipas kohës së Kosovës, mbyllen qendrat e votimit në Georgia, South Carolina dhe Virginia, ndërsa 30 minuta më vonë përfundon votimi edhe në North Carolina, Ohio dhe West Virginia.
Këto shtete zakonisht i numërojnë votat relativisht shpejt. Në zgjedhjet e vitit 2024, Georgia kishte përfunduar numërimin e 90% të votave deri në orën 22:21 sipas kohës lokale të bregdetit lindor amerikan.
Në orën 02:00 të së mërkurës, sipas kohës së Kosovës, mbyllen plotësisht ose pjesërisht qendrat e votimit në pothuajse gjysmën e shteteve amerikane, përfshirë Florida, Maine, New Hampshire dhe Pennsylvania.
Një tjetër moment i rëndësishëm pritet në orën 03:00, kur përfundon votimi në 15 shtete, përfshirë Arizona, Michigan, New York, Texas dhe Wisconsin.
Në këto shtete zhvillohen gara të rëndësishme për Senatin, Dhomën e Përfaqësuesve dhe postet e guvernatorëve.
Sipas AP-së, ritmi i numërimit ndryshon ndjeshëm nga një shtet në tjetrin. Florida njihet për publikimin e shpejtë të rezultateve, ndërsa në Michigan, Pennsylvania dhe Arizona procesi mund të zgjasë më shumë.
Në Arizona, megjithëse votimi përfundon në orën 03:00 sipas kohës së Kosovës, rezultatet e para nuk publikohen para orës 04:00.
Në Kaliforni rezultatet mund të vonohen disa ditë
Në orën 05:00 të së mërkurës, sipas kohës së Kosovës, mbyllen qendrat e votimit në California dhe Washington.
Në këto 2 shtete, ku votimi zhvillohet kryesisht përmes postës, numërimi mund të vazhdojë për disa ditë pas zgjedhjeve.
Në zgjedhjet e vitit 2024, rreth 38% e votave në California dhe 33% në Washington nuk ishin numëruar gjatë natës zgjedhore.
Sipas AP-së, në California do të pranohen fletëvotimet e dërguara me postë deri më 10 nëntor, nëse janë vulosur jo më vonë se dita e zgjedhjeve. Në Washington, afati për pranimin e tyre është 23 nëntori.
Qendrat e fundit të votimit në SHBA do të mbyllen në orën 07:00 të së mërkurës, sipas kohës së Kosovës, në ishujt Aleutian të Alaskës.
Megjithatë, shpallja e fituesve në disa gara mund të kërkojë më shumë kohë, veçanërisht në shtetet ku diferenca ndërmjet kandidatëve është e vogël.
Zgjedhjet e mesmandatit konsiderohen një provë e rëndësishme politike për presidentin Donald Trump, pasi rezultati do të përcaktojë raportin e forcave ndërmjet republikanëve dhe demokratëve në Kongres gjatë pjesës së mbetur të mandatit të tij.
