Sekretari Mullin: agjentët e ICE nuk u dërguan në qendrat e votimit, prania e tyre do të ishte vetëm në rast kërcënimi
Sekretari i Sigurisë Kombëtare, Markwayne Mullin, u tha gazetarëve në Shtëpinë e Bardhë se agjentët e imigracionit nuk janë rreth qendrave të votimit, ndërsa departamenti i tij do të mbledhë regjistrat e votimit për të verifikuar se askush nuk ka votuar në mënyrë të paligjshme
Sekretari i Sigurisë Kombëtare i Shteteve të Bashkuara, Markwayne Mullin, u tha të martën gazetarëve në Shtëpinë e Bardhë se agjencia e tij nuk ka dërguar oficerë të imigracionit në qendrat e votimit, duke iu përgjigjur një shqetësimi të madh që grupet për të drejtat e votuesve dhe të emigrantëve kishin ngritur para ditës së zgjedhjeve.
“Agjentët e ICE nuk do të jenë rreth qendrave të votimit, përveçse nëse ka një kërcënim”, tha Mullin për Fox News, siç njofton USA Today në blogun e saj live të ditës së zgjedhjeve. “E vetmja arsye pse do të shihnit Departamentin e Sigurisë Kombëtare është nëse ka një kërcënim ndaj të cilit duhet të përgjigjemi. Kjo nuk është puna e tyre.”
Mullin tha gjithashtu se agjencia e tij do të mbledhë regjistrat e votimit për t’u “siguruar që askush nuk ka votuar në mënyrë të paligjshme”. Departamenti i Sigurisë Kombëtare prej muajsh ka derdhur burime në një përpjekje për të gjetur emigrantë pa dokumente që janë regjistruar për të votuar.
Sipas shifrave federale që citon USA Today, Departamenti i Drejtësisë ka akuzuar 236 persona për vepra të lidhura me mashtrimin e votuesve që nga fillimi i mandatit të dytë të presidentit Donald Trump, një shifër që New York Times e ka raportuar më herët. Për krahasim, në zgjedhjet presidenciale të vitit 2024 votuan 174 milionë njerëz.
Deklarata e Mullinit vjen në një ditë zgjedhore që, deri tani, ka kaluar kryesisht pa probleme serioze të integritetit të votimit. Siç njofton USA Today, autoritetet federale të armatosura nuk janë shfaqur në qendrat e votimit, pavarësisht frikës së punonjësve zgjedhorë dhe grupeve për të drejtat e votimit, dhe kërcënimi i ndërhyrjes nga Rusia apo kundërshtarë të tjerë të huaj nuk është materializuar.
“Në këtë moment, nuk po shohim atë lloj ndërhyrjeje sistemike në shkallë të gjerë për të cilën ishim përgatitur”, tha për USA Today Leah Greenberg, bashkëthemeluese e organizatës Indivisible, e cila shtoi se raportimet e izoluara për prani federale në qendra votimi, të dëgjuara deri në orën 16:30, ishin zgjidhur shpejt.
Në Michigan, ku komuniteti shqiptar dhe komunitete të tjera emigrante ndjekin me vëmendje çështjen e pranisë së agjentëve federalë, dita e votimit ka vijuar pa raportime për agjentë të ICE në qendrat e votimit. Qendrat në pjesën më të madhe të shtetit mbyllen në orën 20:00, ndërsa në katër qarqe të Gadishullit të Sipërm në orën 21:00, dhe rezultatet e para pritet të vijnë pas mbylljes.
