Louis Vuitton krijon post të ri kreativ: Hector Muelas bëhet drejtori kryesor i markës
Louis Vuitton ka krijuar një pozicion krejt të ri, atë të drejtorit kryesor kreativ të markës, dhe ia ka besuar atë Hector Muelas-it. Lajmi raportohet nga Models.com, duke iu referuar WWD-së, në përmbledhjen e lajmeve më të rëndësishme të modës të ditëve të fundit.
Muelas vjen nga Tiffany & Co., ku shërbente si drejtor global i markës dhe i kreativitetit që nga gushti i vitit 2023. Para Tiffany-t, ai kaloi vite te Rimowa, ku udhëhoqi rilançimin global të markës gjermane të valixheve luksoze — një përvojë që e bëri një nga figurat më të kërkuara të komunikimit në industrinë e luksit.
Në detyrën e re, të cilën e mori nga 1 nëntori, Muelas do të raportojë te zv/drejtori ekzekutiv Damien Bertrand dhe do të marrë përgjegjësinë për të gjitha fushatat e markës dhe rrëfimin kreativ të Louis Vuitton në çdo pikë kontakti me publikun. Me këtë riorganizim, edhe ekipet e blerjes së artit dhe të përmbajtjes do të bëhen pjesë e strukturës së tij.
Emërimi është një tjetër lëvizje në krye të shtëpive të mëdha të luksit këtë vjeshtë dhe tregon rëndësinë që Louis Vuitton i jep komunikimit të markës: shtëpia franceze po e centralizon drejtimin kreativ të imazhit nën një figurë të vetme, në një moment kur konkurrenca për vëmendjen e publikut në tregun global të luksit bëhet gjithnjë e më e fortë.
