Betim Fazliji i bashkohet Kosovës për dy ndeshjet e Ligës së Kombeve

Betim Fazliji i është bashkuar Kombëtares së Kosovës për dy ndeshjet e fundit të këtij edicioni të Ligës së Kombeve. Siç njofton Telegrafi, mbrojtësi i St. Gallenit do të jetë në dispozicion të përzgjedhësit Franco Foda për përballjet ndaj Izraelit dhe Irlandës, pasi FFK-ja ka konfirmuar ardhjen e tij në kampin e “Dardanëve”.

Kosova po përgatitet për dy sfida të rëndësishme në Grupin B3, ku synon ta përfundojë edicionin me rezultate pozitive. Pas katër ndeshjeve të zhvilluara, ekipi kombëtar renditet i dyti me pesë pikë, tri më pak se Austria që kryeson grupin.

Ndeshja e parë do të zhvillohet më 14 nëntor në stadiumin “Fadil Vokrri”, ku Kosova do të jetë nikoqire e Izraelit, ndërsa tri ditë më vonë Dardanët do të përballen me Republikën e Irlandës në Dublin.

Fazliji, 27-vjeçar, mund t’i ofrojë Fodës alternativa në repartin defensiv. Mbrojtësi kishte kaluar një periudhë të vështirë për shkak të lëndimeve, por në maj të këtij viti ishte rikthyer në grumbullimin e Kosovës pas një kohe të gjatë.

Sipas të gjitha gjasave, Fazliji do të jetë zëvendësues i Lumbardh Dellovës, me këtë të fundit që mbetet në dyshim për shkak të disa shqetësimeve pas një lëndimi të pësuar me klubin e tij.