Maersk heton incident sigurie IT: qasje e paautorizuar dhe nxjerrje të dhënash nga një sistem lokal
Kompania daneze e transportit detar Maersk njoftoi të mërkurën se po heton një incident sigurie IT që përfshin qasje të paautorizuar dhe nxjerrje të dhënash nga një prej sistemeve të saj lokale të vjetra, siç njofton Reuters.
Në deklaratën e saj, Maersk tha se gjetjet e deritanishme sugjerojnë fort se nuk janë zbuluar të dhëna të ndjeshme, duke qetësuar shqetësimet e para për pasojat e incidentit.
“Incidenti është i izoluar në një sistem lokal dhe nuk kemi gjetur asnjë tregues se ka pasur ndikim në sistemet e tjera të Maersk-ut apo në sistemet e klientëve dhe partnerëve që lidhen me Maersk”, tha kompania.
Maersk shtoi se nuk parashikon ndërprerje të operacioneve për klientët. Sipas kompanisë, klientët mund të vazhdojnë të përdorin platformat e saj për të rezervuar dhe menaxhuar dërgesat e tyre si zakonisht, ndërsa hetimi për incidentin vazhdon.
