Sulm me raketa ndaj selisë së bandës në Haiti, Presidenti i El Salvadorit publikon pamjet e operacionit (VIDEO)
Presidenti i El Salvadorit, Nayib Bukele, ka publikuar pamjet e një operacioni ushtarak kundër bandës kriminale “400 Mawozo” në Haiti. Në videon 48-sekondëshe shihen disa helikopterë ushtarakë që lëshojnë raketa drejt një ndërtese, e cila shërbente si seli e grupit kriminal. Sipas raportimeve, nga sulmi kanë humbur jetën të paktën 20 persona, por ky bilanc nuk është konfirmuar në mënyrë të pavarur.
Operacioni u zhvillua më 8 nëntor në komunën Croix-des-Bouquets, në lindje të kryeqytetit Port-au-Prince. Objektiv ishte rezidenca dhe qendra e operacioneve të Wilson Joseph, i njohur me nofkën “Lanmo San Jou”, drejtues i bandës “400 Mawozo”. Megjithatë, Joseph nuk ndodhej në ndërtesë në momentin e sulmit dhe nuk u arrestua.
Sipas raportimit të “Miami Herald”, operacioni u krye nga policia haitiane, me mbështetjen e forcave ushtarake të El Salvadorit. Bukele njoftoi më 10 nëntor shkatërrimin e pronës, duke shkruar në rrjetin social X: “E kemi mbajtur premtimin tonë”. Ai tha se shumica e anëtarëve të bandës ishin larguar nga zona pa bërë rezistencë.
Operacioni pasoi një shkëmbim të pazakontë mesazhesh në internet. Më 5 nëntor, një përdorues i platformës X publikoi fotografinë e një shtëpie dykatëshe, duke pretenduar se ajo i përkiste drejtuesit të bandës, dhe i kërkoi presidentit salvadorian ta shkatërronte. Një ditë më vonë, Bukele iu përgjigj: “Ku është kjo shtëpi? Na jepni adresën e saktë dhe ne do ta shkatërrojmë”.
Prania ushtarake e El Salvadorit në Haiti ishte shtuar pas zhdukjes së katër teknikëve salvadorianë të helikopterëve, më 18 tetor, pas një sulmi nga persona të armatosur në një periferi të kryeqytetit haitian. Bukele urdhëroi dislokimin e më shumë se 2 000 ushtarëve, fillimisht me qëllim gjetjen e personave të zhdukur, por më pas operacionet u zgjeruan edhe kundër grupeve të krimit të organizuar.
Nou kenbe pwomès nou… Nou detwi kay Lanmò San Jou ak katye jeneral gang 400 Mawozo a. Pifò ladan yo kouri ale san yo pa menm eseye goumen. Ala lach yo lach! 🥲 https://t.co/0AVIOJRKhn
Banda “400 Mawozo” konsiderohet një nga grupet kriminale më të fuqishme në Haiti dhe është e lidhur me raste rrëmbimesh dhe zhvatjesh. Në vitin 2021, ajo rrëmbeu 17 misionarë, mes tyre 16 shtetas amerikanë dhe një kanadez.
Ndërkohë, përfshirja e forcave ushtarake të El Salvadorit në operacion ngre pikëpyetje mbi bazën ligjore të pranisë së tyre në Haiti, pasi pjesa më e madhe e ushtarëve nuk janë pjesë e misionit ndërkombëtar të sigurisë kundër bandave, të mbështetur nga OKB-ja.
Organizata Amnesty International u ka bërë thirrje qeverive të të dy vendeve të bëjnë publike marrëveshjen për vendosjen e trupave dhe të garantojnë respektimin e të drejtave të njeriut gjatë operacioneve.
Nga ana e tij, presidenti i Republikës Dominikane, Luis Abinader, ka shprehur mbështetjen për operacionet e El Salvadorit, duke bërë të ditur se vendi i tij po ofron ndihmë logjistike dhe informacione. Megjithatë, ai ka kërkuar edhe koordinim më të mirë me forcën ndërkombëtare të sigurisë që vepron në Haiti.
