Studimi: Rreziku i demencës rritet me numrin e cigareve të pira në ditë

Një rishikim shkencor që përfshinte rreth 2.8 milionë njerëz zbuloi se pirja e duhanit shoqërohet me një rrezik në rritje të demencës, sëmundjes së Alzheimerit dhe demencës vaskulare. Ky rrezik mësohet se rritet me rritjen e numrit të cigareve të konsumuara në ditë.

Sipas studimit, i cili u drejtua nga studiues të Universitetit Curtin në Australi dhe u botua në revistën “eClinicalMedicine”, duhanpirësit përballen me një rrezik 31% më të lartë për të zhvilluar demencë krahasuar me njerëzit që nuk kanë pirë kurrë duhan.

Rreziku u rrit në 40% për sëmundjen e Alzheimerit dhe në 52% për demencën vaskulare. Studiuesit vunë re një lidhje midis numrit të cigareve të pira në ditë dhe gjasave për të zhvilluar demencë.

Njerëzit që pinë 10 cigare në ditë përballen me një rrezik 16% më të lartë, ndërsa rreziku rritet në 34% tek ata që pinë 20 cigare në ditë, krahasuar me njerëzit që nuk kanë pirë kurrë duhan.

Studiuesi kryesor Mario Serfo tha se gjetjet tregojnë nevojën për t’i kushtuar vëmendje ndikimit të pirjes së duhanit në shëndetin e trurit, së bashku me rreziqet e njohura të tij për zemrën dhe mushkëritë dhe gjasat e zhvillimit të kancerit.

Ai shtoi se lidhja midis pirjes së duhanit dhe demencës bëhet më e fortë me rritjen e numrit të cigareve të konsumuara. Studimi tregoi se njerëzit që e kishin lënë duhanin nuk përballen me një rrezik më të lartë për të zhvilluar demencë krahasuar me ata që nuk kanë pirë kurrë duhan, dhe se rreziku i tyre është më i ulët se ai i njerëzve që vazhdojnë të pinë duhan.

Megjithatë, studiuesit shpjeguan se gjetjet e studimit nuk vërtetojnë një marrëdhënie të drejtpërdrejtë shkakësore midis pirjes së duhanit dhe demencës, megjithëse ato i shtojnë provave shkencore që sugjerojnë se lënia e duhanit mund të ndihmojë në uljen e rrezikut të zhvillimit të sëmundjes.

Blossom Stephan, një bashkautore e studimit, bëri thirrje që shëndeti i trurit të përfshihet në diskutimet rreth rreziqeve të pirjes së duhanit dhe përfitimeve shëndetësore të lënies së tij.

Studiuesit theksuan nevojën për të zgjeruar fushatat e kontrollit të duhanit, në mënyrë që ata të paralajmërojnë edhe për ndikimin e pirjes së duhanit në funksionin e trurit dhe aftësitë njohëse, përveç rreziqeve të njohura për zemrën dhe mushkëritë dhe gjasave të zhvillimit të kancerit.