Formacionet zyrtare, Hoxha zëvendëson Muçin e dëmtuar, titullar edhe Shehu kundër Bjellorusisë

Kombëtarja shqiptare ka zyrtarizuar formacionin për ndeshjen e fundit të grupit në Ligën e Kombeve kundër Bjellorusisë, që luhet sot në orën 18:00 në Budapest të Hungarisë, siç njofton Shqiptarja.com. Ernest Muçi, i dëmtuar, zëvendësohet në sulm nga Arbër Hoxha, ndërsa titullar në mesfushë është edhe Julian Shehu.

Kuqezinjtë vijnë në këtë duel si të parët e grupit me 12 pikë, dy më shumë se Bjellorusia e vendit të dytë, e vetmja përfaqësuese që i kërcënon për kreun. Për këtë arsye, të besuarve të trajnerit Maran u mjafton edhe një barazim për të përmbushur objektivin dhe për ta mbyllur grupin në vendin e parë.

Shqipëria do të rreshtohet me skemën 3-4-2-1. Në portë do të jetë Etrit Berisha, ndërsa mbrojtjen e përbëjnë Berat Gjimshiti, Ardian Ismajli dhe Mario Mitaj. Në mesfushë, nga krahët do të luajnë Elseid Hysaj dhe Stavro Pilo, ndërsa në qendër Kristjan Asllani do të mbështetet nga Julian Shehu. Përpara, Arbër Hoxha dhe Qazim Laçi do të mbështesin Rey Manajn.

Muçi, autori i një supergoli kundër Finlandës, mungon për shkak të dëmtimit që pësoi në atë përballje. Shehu, nga ana e tij, ka marrë vendin e Ylber Ramadanit, i cili mungon për shkak të kartonëve.

Statistikat janë në favor të kuqezinjve: në tetë përballjet e mëparshme me Bjellorusinë, Shqipëria ka katër fitore, kundrejt dy fitoreve të rivalëve dhe dy barazimeve, ndërsa në renditjen e fundit të FIFA-s, të përditësuar në tetor, Shqipëria është e 66-ta dhe Bjellorusia e 94-ta. Ndeshjen do ta gjykojë arbitri kroat Igor Pajac, i zgjedhur nga UEFA.