Carmila propozon blerjen e IGD-së italiane, krijohet grup qendrash tregtare me portofol prej 9 miliardë eurosh
Grupi francez i pasurive të paluajtshme tregtare Carmila njoftoi të hënën se ka propozuar një kombinim “miqësor” me rivalen italiane IGD, në një marrëveshje që do të krijonte një operator qendrash tregtare të Evropës Perëndimore me një portofol pronash prej 9 miliardë eurosh, ose rreth 10 miliardë dollarë, siç njofton Reuters.
Sipas kushteve të njoftuara, Carmila ka nënshkruar një marrëveshje me aksionarin më të madh të IGD-së, Coop Alleanza 3.0, sipas së cilës investitori pranoi të kontribuojë rreth 41 për qind të aksioneve të IGD-së në këmbim të aksioneve të reja të lëshuara nga Carmila. Për çdo aksion të IGD-së të dorëzuar, Coop Alleanza 3.0 do të marrë 0,31 aksione të reja të Carmila-s.
Pas këtij shkëmbimi, Carmila do të nisë një ofertë të detyrueshme publike shkëmbimi për të gjitha aksionet e mbetura të IGD-së, me të njëjtat kushte, me synimin që kompania italiane të hiqet nga listimi në bursë. Aksionari i dytë më i madh i IGD-së, Unicoop Etruria, ka bërë të ditur se do të dorëzojë pjesën e tij prej 10 për qind në ofertën e detyrueshme.
Kompania franceze tha se transaksioni pritet të sjellë rreth 15 milionë euro kursime vjetore në kosto. Kombinimi i dy grupeve do të bashkonte rrjetet e tyre të qendrave tregtare në Francë dhe në Itali nën një operator të vetëm evropian perëndimor.