BRUKSEL – BE-ja përgatit qëndrimin për negociatat me Rusinë, “Coreper” pritet të udhëzojë përfaqësuesit evropianë
BRUKSEL, 16 nëntor /ATSH-ANSA/ – Bashkimi Evropian po përgatit koordinimin e qëndrimit të vendeve evropiane në negociatat me Rusinë.
Në këtë kuadër, Komiteti i Përfaqësuesve të Përhershëm të vendeve anëtare pranë BE-së (Coreper) pritet të japë udhëzime për mënyrën se si do të përfaqësohet Evropa në këto bisedime.
Sipas një zyrtari evropian, të cituar nga agjencia italiane e lajmeve ANSA, përfaqësimi evropian në negociata, pritet të bëhet përmes formatit E5+BE, që përfshin pesë vende evropiane dhe Bashkimin Evropian.
“Duhet të kalojmë tani drejt një qasjeje më aktive”, deklaroi zyrtari.
Megjithatë, ende nuk është përcaktuar nëse udhëzimet që do të japë “Coreper”, do të përbëjnë një mandat zyrtar për negociatat apo thjesht orientime për institucionet evropiane.
Zyrtari theksoi se “Coreper” ka kompetencën të japë udhëzime për institucionet e Bashkimit Evropian, por jo drejtpërdrejt për shtetet anëtare.
Në këtë proces përfshihet edhe NATO-ja, por mbetet ende e paqartë se si do të përcaktohet roli i saj dhe mandati për përfaqësimin në negociata.
Përgatitja e një qëndrimi të përbashkët synon të sigurojë një koordinim më të mirë të palës evropiane në bisedimet me Rusinë. /