E hënë, 16 Nëntor 2026
54°F Detroit
Ballina›Futbolli ne Kosove›Lajm i mirë për Kosovën, Irlanda mbetet pa kapitenin Nathan Collins

Lajm i mirë për Kosovën, Irlanda mbetet pa kapitenin Nathan Collins

Lajm i mirë për Kosovën para ndeshjes së së martës në Ligën e Kombeve, siç njofton Telegrafi: Irlanda do të luajë pa kapitenin e saj, Nathan Collins, i cili është përjashtuar nga përballja me Dardanët për shkak të një dëmtimi në gju.

Trajneri i Irlandës, Heimir Hallgrimsson, konfirmoi të hënën se mbrojtësi ka lënë grumbullimin dhe është kthyer te klubi i tij, Brentford, për ekzaminime të mëtejshme mjekësore. Sipas tij, një skanim u krye në Dublin dhe u vendos që Collins të kthehet te Brentford-i për kontrolle të tjera, ndaj ai nuk do të jetë në skuadër për ndeshjen.

Dëmtimi ndodhi në fund të ndeshjes kundër Austrisë, të cilën Irlanda e humbi 1-0 të shtunën në Linz. Menjëherë pas asaj përballjeje, Hallgrimsson kishte paralajmëruar se kapiteni do t’i nënshtrohej kontrolleve mjekësore.

Mungesa e Collins është një goditje e rëndë për irlandezët, pasi ai është kapiteni i ekipit dhe një lojtar kyç në mbrojtje. Ai ka luajtur vetëm në një nga gjashtë ndeshjet e Irlandës në këtë edicion të Ligës së Kombeve, pasi mungoi edhe në grumbullimet e shtatorit dhe të tetorit për shkak të një dëmtimi në pulpë.

Në vend të tij, në listë është ftuar Jimmy Dunne, i cili do të zëvendësojë kapitenin e dëmtuar. Ndërkohë, Seamus Coleman nuk do të jetë pjesë e ekipit si lojtar, pasi ai vazhdon në rolin e tij të kombinuar si trajner dhe asistent.

Hallgrimsson qetësoi edhe situatën rreth James Abankwah, i cili pati ngërçe muskulore në ndeshjen kundër Austrisë. Sipas trajnerit, mbrojtësi është rikuperuar dhe pritet të jetë i gatshëm për përballjen me Kosovën.

Irlanda e pret Kosovën të martën në stadiumin Aviva në Dublin, në një ndeshje ku vendasit duhet të fitojnë për të siguruar play-offin për ngjitjen në Ligën A të Ligës së Kombeve, që do të luhet në mars.

Lini një koment