Startup-i Corma arrin vlerësimin 1 miliard dollarë vetëm tre muaj pas daljes në treg
Startup-i i sigurisë kibernetike me inteligjencë artificiale Corma ka mbledhur 125 milionë dollarë në një raund financimi Series A, me një vlerësim prej 1 miliard dollarësh, siç njofton TechCrunch. Raundi u udhëhoq nga fondi NEA (New Enterprise Associates), ndërsa kompania e njoftoi zyrtarisht marrëveshjen edhe përmes një komunikate të shpërndarë nga BusinessWire; lajmin e raportoi edhe Wall Street Journal.
Me këtë raund, financimi total i Corma-s arrin në 185 milionë dollarë, vetëm tre muaj pasi kompania doli nga faza “stealth” në gusht me një financim fillestar (seed) prej 60 milionë dollarësh. Në raundin e ri morën pjesë edhe investitorët ekzistues Sequoia Capital, Khosla Ventures dhe Coatue.
Corma, e themeluar në vitin 2025 nga Alon Pluda, ish-anëtar i njësisë izraelite të inteligjencës 8200, me seli në Tel Aviv dhe San Francisko dhe rreth 25 punonjës, ndërton modele themelore të inteligjencës artificiale të trajnuara posaçërisht për mbrojtjen kibernetike. Modelet e saj vendosen në punë si agjentë autonomë që veprojnë përkrah ekipeve të sigurisë në ndërmarrje.
Sipas raportimit të TechCrunch, interesi për produktin e Corma-s u rrit ndjeshëm pas një sërë incidentesh sigurie më 21 tetor, kur u zbuluan një defekt kritik në gjuhën e programimit PHP, një tjetër në Node.js dhe një incident në mjetin e njohur LiteLLM — një ditë që tregoi përmasat e sulmeve që inteligjenca artificiale ka bërë të mundura.
“Corma po ndërton shtresën e inteligjencës që i duhet sigurisë mbrojtëse”, tha Aaron Jacobson, partner në NEA, sipas komunikatës së kompanisë, e cila thotë se përdorimi i modeleve të saj nga kompani të listës Fortune 500 po rritet ndjeshëm. Në të njëjtën garë të sigurisë kibernetike me AI veprojnë edhe startup-i Armadin i Kevin Mandia-s, si dhe Anthropic, OpenAI dhe Microsoft.