Dy armë më shumë për Karoglan, Partizanit i kthehen titullarët për duelin ndaj Vllaznisë
Partizani po përgatitet për një tjetër sfidë të rëndësishme në kampionat, atë kundër Vllaznisë, ndërsa në kampin e kuq ka edhe zhvillime pozitive sa i përket gjendjes së futbollistëve.
Altin Aliu dhe Seku Sidibe janë dy “përforcimet” që trajneri pritet të ketë në dispozicion për këtë përballje. Të dy futbollistët janë bashkuar prej disa ditësh me skuadrën dhe tashmë janë në gjendje të jenë pjesë e grupit për ndeshjen ndaj shkodranëve. Rikthimi i tyre është një lajm i mirë për stafin teknik, që fiton dy alternativa më shumë në prag të një takimi ku Partizani do të kërkojë të bëjë një paraqitje pozitive.
Mungesat dhe problemet fizike kanë kushtëzuar në periudha të ndryshme zgjedhjet e trajnerit, ndaj rikthimi i lojtarëve është një ndihmë e rëndësishme për skuadrën. Ndërkohë, në rrugën e rikthimit është edhe Preka. Futbollisti është pothuajse gati dhe pritet të shihet nëse do të jetë plotësisht në dispozicion për këtë ndeshje. Situata e tij do të ndiqet me kujdes gjatë ditëve të ardhshme, për të mos rrezikuar një rikthim të parakohshëm.
Megjithatë, përpara se të përcaktohet grupi përfundimtar për sfidën me Vllazninë, mbetet për t’u vlerësuar edhe gjendja e futbollistëve të tjerë që kanë pasur probleme dëmtimesh. Stafi teknik dhe ai mjekësor do të kenë në vëmendje ecurinë e tyre, për të kuptuar se cilët mund të jenë të gatshëm për këtë përballje.
Në këtë mënyrë, Partizani shpreson të rikuperojë sa më shumë futbollistë dhe të shkojë drejt ndeshjes me Vllazninë me një grup më të plotë. Aliu dhe Sidibe janë dy emrat që tashmë konsiderohen të gatshëm, ndërsa për Marçelino Prekën dhe lojtarët e tjerë do të vendoset në varësi të gjendjes fizike në ditët në vijim.
PANORAMASPORT.AL