Korreshi kërkon Ministren e Shëndetësisë në Kuvend: Në pediatrinë e Lushnjës ka minj

Deputeti i Partisë Demokratike, Saimir Korreshi, ka kërkuar në Kuvend praninë e Ministres së Shëndetësisë, Evis Sala, për të dhënë shpjegime lidhur me një problem që ai thotë se vjen nga zona që përfaqëson, Lushnja.

Gjatë fjalës së tij në sallën e parlamentit, Korreshi ngriti shqetësimin për gjendjen e pediatrisë në Lushnjë, duke deklaruar se sipas tij në ambientet e spitalit janë konstatuar minj.

“Doja t’i tregoja pamjet e pediatrisë së Lushnjës, po na hanë minjtë. Po lozin minjtë te pediatria,” u shpreh ai, duke theksuar se situata është e papranueshme sidomos pasi bëhet fjalë për fëmijë.

Ai kërkoi që ministrja të jetë e pranishme në Kuvend dhe të japë llogari për situatën, duke shtuar se sipas tij kërkesat për interpelancë nuk janë marrë gjithmonë parasysh.