Ish-bankieri i JPMorgan, Chirayu Rana, punëson avokatin që përfaqësoi akuzueset e Jeffrey Epstein

Rana, 35 vjeç, i identifikuar në dokumentet gjyqësore si “John Doe”, ngriti javën e kaluar një padi të bujshme ndaj drejtoreshës ekzekutive të JPMorgan, Lorna Hajdini, duke pretenduar se ajo e kishte droguar dhe kishte tentuar ta kthente në një “skllav seksual”.

Padia, e cila përfshin pretendime për dëme emocionale dhe dëmtim të reputacionit, u hoq përkohësisht nga regjistri i gjykatës vetëm pak orë pas depozitimit fillestar për korrigjime procedurale, por më pas u ridorëzua me akuza të reja.

Daniel Kaiser, partner në firmën ligjore të Nju Jorkut “Kaiser, Saurborn & Mair”, deklaroi se janë paraqitur prova mbështetëse për pretendimet e klientit të tij dhe se ekzistojnë edhe prova të tjera që ende nuk janë bërë publike.

Nga ana tjetër, JPMorgan i ka mohuar kategorikisht akuzat. Një zëdhënës i bankës tha se pretendimet janë “plotësisht të fabrikuara” dhe se një hetim i brendshëm nuk gjeti prova që mbështesin akuzat e Rana-s. Sipas bankës, ai kishte refuzuar të bashkëpunonte dhe të jepte fakte konkrete gjatë hetimit.

Sipas burimeve të afërta me çështjen, JPMorgan i kishte ofruar Rana-s rreth 1 milion dollarë për të hequr dorë nga pretendimet, por ai thuhet se ka kërkuar një marrëveshje financiare mbi 20 milionë dollarë.

Avokati Kaiser është i njohur për përfaqësimin e disa grave që akuzuan financierin famëkeq Jeffrey Epstein për abuzime seksuale. Mes tyre ishte edhe Jennifer Araoz, e cila pretendonte se Epstein e kishte manipuluar seksualisht që në moshën 14-vjeçare.

Pas vetëvrasjes së Epstein në vitin 2019, Kaiser kishte deklaruar publikisht se klientja e tij ishte e zhgënjyer që ai nuk do të përballej më me drejtësinë në gjykatë, por ishte e vendosur të vazhdonte procesin civil kundër pasurisë së tij dhe bashkëpunëtorëve të dyshuar.

Ndërkohë, Lorna Hajdini dhe JPMorgan vazhdojnë të mohojnë çdo akuzë të ngritur nga Rana.