Macomb County: 28-vjeçari akuzohet për torturë ndaj kafshës, çështja kalon në gjykatën e qarkut
Prokurori i Qarkut Macomb, Peter J. Lucido, njoftoi se 28-vjeçari Michael Sikorski, banues në St. Clair Shores, ka hequr dorë nga seanca paraprake në lidhje me akuzën për torturë ndaj kafshës në shkallën e tretë, pasi dyshohet se ka abuzuar fizikisht me qenin e tij.
Seanca paraprake ishte planifikuar të zhvillohej të premten, më 10 prill 2026, në Gjykatën e Distriktit të 40-të në St. Clair Shores. Sikorski hoqi dorë nga e drejta për këtë seancë dhe çështja u referua për gjykim në Gjykatën e Qarkut Macomb.
Ai pritet të paraqitet për seancën e parë (arraignment) në Gjykatën e Qarkut më 20 prill 2026, në orën 1:30 pasdite.
Sikorski është akuzuar për veprën penale “Torturë ndaj kafshës – shkalla e tretë”, një krim që në Michigan dënohet deri në katër vite burg. Masa maksimale e dënimit përcaktohet në bazë të provave të paraqitura në gjykatë.
Sipas akuzës, ngjarja ka ndodhur më 15 mars 2026, kur Sikorski dyshohet se ka përplasur qenin e tij, të quajtur Steel, në tokë, e ka goditur disa herë me shkelma dhe e ka ngritur nga zinxhiri duke e mbytur, përpara se ta përplaste sërish në tokë.
Autoritetet besojnë se qeni nuk ka pësuar dëmtime të përhershme.
Më 16 mars, një ditë pas incidentit të dyshuar, ndaj Sikorskit u ngrit zyrtarisht akuza për torturë ndaj kafshës në shkallën e tretë. Gjykata caktoi një garanci prej 25,000 dollarësh.
Sipas ligjit në shtetin e Michiganit, vrasja apo torturimi i qëllimshëm i një kafshe përbën vepër penale. Dënimet ndryshojnë në varësi të rrethanave të rastit, përfshirë faktin nëse kafsha është shtëpiake apo shoqëruese. Në raste kur abuzimi ndaj kafshëve lidhet me dhunë në familje, dënimi mund të arrijë deri në 10 vite burg.
