Detroit nis një ligë falas të futbollit me flamur për adoleshentët, me synimin për të ulur dhunën dhe për të krijuar hapësira të sigurta

DETROIT – Organizatat e ndërhyrjes kundër dhunës në komunitet në Detroit kanë zgjeruar aktivitetin e tyre përtej rrugëve dhe programeve tradicionale, duke nisur këtë pranverë një ligë falas të futbollit me flamur (flag football) për adoleshentët. Nisma synon t’u ofrojë të rinjve një ambient të sigurt për t’u argëtuar, për të zhvilluar aftësi të reja dhe për të krijuar lidhje pozitive me mentorë dhe trajnerë.

Finalet e kampionatit u zhvilluan të premten, më 22 maj, në Chandler Park Fieldhouse Dome, ku ekipet pjesëmarrëse garuan për titullin e sezonit të parë të ligës.

Për shumë të rinj, programi ka qenë më shumë sesa një aktivitet sportiv. Martell Jones, nxënës i shkollës së mesme Denby High School, tha se trajnerët kanë luajtur një rol të rëndësishëm në motivimin dhe zhvillimin e pjesëmarrësve.

“Ju japin mundësinë të tregoni më të mirën nga vetja dhe të bëni maksimumin. Secili prej këtyre trajnerëve është këtu për t’ju ndihmuar të bëheni më të mirë,” u shpreh ai.

Liga është pjesë e një përpjekjeje më të gjerë të organizatave të ndërhyrjes kundër dhunës në komunitet (CVI), përfshirë Team Pursuit dhe FORCE Detroit, të cilat synojnë të lidhin adoleshentët me mentorë dhe t’u mësojnë aftësi që mund t’i ndihmojnë të menaxhojnë situata të vështira apo konflikte.

Sipas drejtorit ekzekutiv të Team Pursuit, Quincy Smith, fokusi kryesor i programit është zhvillimi i aftësive emocionale dhe sociale.

“Po përqendrohemi te zgjidhja e konflikteve, te mënyra se si të rinjtë mund të kontrollojnë emocionet në situata të tensionuara dhe si të qëndrojnë të qetë. Janë aftësi që do t’u shërbejnë gjatë gjithë jetës,” tha Smith.

Edhe drejtuesja e programeve në FORCE Detroit, Ciera Renee, theksoi se sporti përdoret si mjet për të tërhequr të rinjtë, por qëllimi i vërtetë shkon përtej fushës së lojës.

“Ne përdorim sportin për t’i angazhuar, por puna më e rëndësishme ndodh jashtë fushës. Aty flasim për përgjegjësinë personale, vetëkontrollin emocional dhe aftësitë për të marrë vendime të mira. Këto elemente janë pjesë e programit dhe të rinjtë kanë mundësi t’i praktikojnë edhe gjatë lojës,” tha Renee.

Një nga karakteristikat kryesore të nismës është fakti se pjesëmarrja është plotësisht falas. Nuk ka tarifa regjistrimi dhe organizatorët sigurojnë edhe pajisjet sportive, përfshirë këpucët speciale për lojë, duke eliminuar pengesat financiare që shpesh i mbajnë larg aktivitetit shumë familje.

Programi është pjesë e iniciativës më të gjerë të qytetit të Detroitit, të njohur si Occupy the Summer, e cila po zgjeron aktivitetet për adoleshentët në lagje të ndryshme të qytetit. Kjo nismë synon të krijojë më shumë mundësi argëtimi dhe zhvillimi për të rinjtë, ndërsa autoritetet përpiqen të frenojnë fenomenin e grumbullimeve masive të adoleshentëve dhe incidenteve të lidhura me to.

“Shumë nga këto probleme burojnë nga mungesa e hapësirave të sigurta dhe aktiviteteve që tërheqin realisht të rinjtë,” tha Renee. “Kur organizatat bashkojnë forcat dhe krijojnë programe të menduara posaçërisht për ta, rezultatet kanë qenë jashtëzakonisht pozitive.”

Mbështetësit e projektit besojnë se çelësi i suksesit qëndron te prania e vazhdueshme e të rriturve që ofrojnë mbështetje dhe orientim.

“Është e rëndësishme që këta të rinj të kenë pranë njerëz që i mbështesin vazhdimisht dhe i inkurajojnë në zgjedhjet pozitive që bëjnë,” shtoi Renee. “Krijimi i këtyre hapësirave të sigurta është thelbësor për të ardhmen e tyre.”

Në kuadër të iniciativës “Occupy the Summer”, qyteti po rikthen gjithashtu programin e basketbollit të mesnatës, po zgjat oraret e qendrave rekreative dhe po organizon aktivitete javore çdo të premte në lagje të ndryshme të Detroitit, me synimin për t’u ofruar të rinjve alternativa pozitive gjatë muajve të verës.