Banori i Michiganit ndërton vetë një pengesë shpejtësie para shtëpisë, policia e detyron ta heqë pas më pak se një ore

LINCOLN PARK, Michigan – I shqetësuar prej vitesh nga shoferët që lëvizin me shpejtësi të lartë në lagjen e tij, një banor i Lincoln Park vendosi të marrë masa vetë duke ndërtuar një pengesë shpejtësie (speed bump) me asfalt të blerë në dyqan. Megjithatë, “projekti” i tij zgjati më pak se një orë, pasi policia i kërkoi ta hiqte menjëherë për arsye sigurie.

Dale Wells vendosi asfaltin në rrugën Moran Avenue të dielën pasdite, me shpresën se do t’i detyronte drejtuesit e automjeteve të ngadalësonin shpejtësinë pranë shtëpisë së tij. Sot, nga pengesa e improvizuar ka mbetur vetëm një vijë e zbehtë e zezë në asfalt.

Sipas Wells, problemi i shpejtësisë së lartë në rrugë është bërë i padurueshëm.

“Është e rrezikshme,” tha ai, duke shpjeguar se sheh vazhdimisht automjete që kalojnë me shpejtësi dhe injorojnë tabelën e ndalimit pranë shtëpisë së tij.

“Ata kalojnë nëpër shenjën ‘STOP’ sikur të mos ekzistonte fare, veçanërisht rreth orës 10 të mbrëmjes. Nuk shohin drita dhe vazhdojnë pa u ndalur,” tha Wells.

Ai tregoi se e vendosi asfaltin rreth orës 6 të pasdites të dielën, më 17 maj. Vetëm pak minuta më vonë, oficerët e policisë mbërritën në derën e tij dhe e njoftuan se pengesa duhej të hiqej menjëherë sepse mund të krijonte rreziqe për trafikun dhe sigurinë publike.

Vendimi i autoriteteve e zhgënjeu Wells, i cili thotë se kishte kontaktuar më parë disa herë me qytetin dhe policinë për problemin e shpejtësisë, por mendonte se ankesat e tij nuk po merrnin përgjigjen e duhur.

Disa prej fqinjëve të tij shprehën mirëkuptim për veprimin, edhe pse pranojnë se ishte një zgjidhje e pazakontë.

“Sigurisht që ishte paksa e çmendur, por ai nuk e ka gabim,” tha Raquel Diaz, banore e Moran Avenue dhe nënë e dy fëmijëve të vegjël.

Sipas saj, trafiku i shpejtë e ka bërë të vështirë që fëmijët të luajnë të sigurt përpara shtëpisë.

“Frika ime më e madhe është që fëmija im ose ndonjë fëmijë tjetër të goditet nga një makinë dhe pasojat të jenë fatale,” tha Diaz.

Pas interesimit të medias lokale për çështjen, Departamenti i Policisë së Lincoln Park sqaroi se aktualisht nuk ekziston asnjë pengesë zyrtare shpejtësie në qytet. Megjithatë, drejtuesit e policisë thanë se kjo mund të ndryshojë nëse banorët paraqesin ankesa formale për probleme të trafikut në lagjet e tyre.

Sipas procedurës, policia mund të kryejë një studim të trafikut për të vlerësuar nëse shpejtësia paraqet një problem serioz. Nëse rezultatet e studimit e justifikojnë, rekomandimet mund t’i paraqiten Këshillit Bashkiak për shqyrtim dhe vendimmarrje.

Autoritetet inkurajojnë qytetarët të raportojnë shqetësimet e tyre duke telefonuar policinë ose duke dërguar një email në adresën traffic@citylp.com.

Menjëherë pas komunikimit të policisë me median, një patrullë u pa duke monitoruar trafikun në Moran Avenue – pikërisht lloji i pranisë policore që Wells kishte kërkuar prej kohësh.

Banorët e rrugës shpresojnë se qyteti do të ndërmarrë masa konkrete, qoftë përmes instalimit të pengesave ligjore të shpejtësisë, qoftë duke rritur kontrollet e policisë, përpara se një aksident i rëndë të ndodhë.