Ish-bankieri i JPMorgan përballet me goditje të rëndë në gjykatë, avokati e braktis pak orë para seancës
Një zhvillim i papritur ka tronditur procesin gjyqësor që ka tërhequr vëmendje të madhe mediatike në Shtetet e Bashkuara, ku ish-bankieri i JPMorgan, Chirayu Rana, po përballet me akuza dhe kundërakuza në një çështje të mbushur me pretendime skandaloze për abuzim seksual, manipulim dhe shpifje.
Sipas raportimeve të mediave amerikane, avokati i njohur Daniel Kaiser, i cili përfaqësonte Rana-n në këtë proces, është tërhequr zyrtarisht nga mbrojtja vetëm pak orë para një seance të rëndësishme gjyqësore të zhvilluar të martën.
Në dokumentet e dorëzuara në gjykatë, Kaiser kërkoi të “shkarkohej” nga përfaqësimi ligjor i klientit të tij. Më surprizuese është fakti se Chirayu Rana nuk ka emëruar ende një avokat të ri dhe, të paktën për momentin, do të përfaqësojë veten në gjykatë si “pro se”, term juridik që përdoret kur një person mbron vetveten pa përfaqësim profesional.
Daniel Kaiser është një emër i njohur në qarqet ligjore amerikane, veçanërisht për përfaqësimin e disa viktimave të pretenduara të Jeffrey Epstein, përfshirë Jennifer Araoz, e cila kishte deklaruar publikisht se ishte manipuluar seksualisht nga Epstein që në moshën 14-vjeçare.
Tërheqja e tij nga çështja e Rana-s ka ngritur pikëpyetje të shumta mbi drejtimin që mund të marrë procesi në vazhdim.
Seanca e së martës konsiderohej e rëndësishme pasi Rana pritej të kërkonte nga gjykata të lejohej të identifikohej në dokumentet zyrtare vetëm si “John Doe”, duke tentuar të mbante anonim identitetin e tij në procesin gjyqësor.
Vetë çështja ka marrë vëmendje të madhe për shkak të pretendimeve të forta të Chirayu Rana kundër koleges së tij në JPMorgan, Lorna Hajdini. Rana pretendon se ishte shndërruar në një “skllav seksual” nga Hajdini gjatë kohës që punonin së bashku në bankën amerikane.
Nga ana tjetër, Lorna Hajdini ka reaguar duke ngritur një padi për shpifje kundër ish-bankierit, duke i cilësuar akuzat si të pavërteta dhe dëmtuese për reputacionin e saj profesional dhe personal.
Ndërkohë, JPMorgan Chase ka refuzuar të komentojë drejtpërdrejt zhvillimet më të fundit, por ka ritheksuar qëndrimin e mëparshëm të bankës se pretendimet e ngritura nga Rana konsiderohen “pa bazë” dhe se institucioni nuk ka ndërmend të arrijë ndonjë marrëveshje pajtimi në këtë çështje.
Skandali vazhdon të tërheqë interes të madh publik jo vetëm për shkak të natyrës sensacionale të akuzave, por edhe sepse përfshin një nga institucionet financiare më të mëdha në botë dhe figura të njohura të sistemit ligjor amerikan.
Me largimin e avokatit të tij dhe me procesin që hyn në një fazë edhe më të ndërlikuar, Chirayu Rana përballet tashmë me një sfidë të re ligjore dhe publike në një çështje që duket larg përfundimit.
