Nis Kampi Rinor “Shën Nënë Tereza 2026” për fëmijët e komunitetit shqiptar në Michigan
Programi veror do të zhvillohet në korrik në kishat "Our Lady of Albanians" dhe "St. Paul", ndërsa regjistrimet janë tashmë të hapura.
Komuniteti katolik shqiptar në Michigan ka hapur regjistrimet për Kampin Rinor “Shën Nënë Tereza 2026”, një program veror edukativ dhe argëtues i organizuar për fëmijët e moshës 6 deri në 12 vjeç.
Sipas njoftimit të organizatorëve, kampi do të zhvillohet në dy javë të veçanta gjatë muajit korrik. Java e parë do të mbahet nga 6 deri më 10 korrik, në ambientet e kishës Our Lady of Albanians, ndërsa java e dytë do të zhvillohet nga 13 deri më 17 korrik në Kishën Katolike Shqiptare Shën Pali. Aktivitetet do të organizohen çdo mbrëmje nga ora 18:00 deri në 21:00.
Kampi synon t’u ofrojë fëmijëve një mjedis të sigurt dhe edukativ, ku përmes lojërave, aktiviteteve krijuese, formimit shpirtëror dhe punës në grup të mësojnë më shumë për besimin, kulturën dhe traditat shqiptare, duke krijuar njëkohësisht miqësi të reja.
Tarifa e regjistrimit është 40 dollarë për fëmijë për regjistrimet e kryera deri më 7 qershor, ndërsa pas kësaj date tarifa është 80 dollarë për fëmijë. Organizatorët theksojnë se numri i vendeve është i kufizuar dhe regjistrimet do të mbyllen sapo të plotësohet kapaciteti, edhe nëse kjo ndodh përpara afatit të parashikuar.
Prindërit që dëshirojnë të regjistrojnë fëmijët e tyre mund ta bëjnë këtë në faqen zyrtare të kampit: stmotherteresacamp.com.
Kampi Rinor “Shën Nënë Tereza” është tashmë një traditë e përvitshme e komunitetit katolik shqiptar në Michigan dhe konsiderohet një nga programet më të rëndësishme verore për edukimin, argëtimin dhe forcimin e lidhjeve mes fëmijëve dhe familjeve shqiptaro-amerikane.
