Migrantët nga Tapachula synojnë qytetet e mëdha në Meksikë pas humbjes së shpresës për SHBA-në

Qindra migrantë, shumica prej tyre nga Haiti, u nisën me këmbë nga qyteti i jugut të Meksikës, Tapachula, të martën, duke kërkuar kushte më të mira jetese në pjesë të tjera të Meksikës.

Këto karvane migrantesh që dikur synonin kalimin drejt kufirit me SHBA-në, tashmë shumë prej tyre kanë humbur shpresën për të arritur në Shtetet e Bashkuara për shkak të kufizimeve që administrata e Trump ka vendosur për kërkuesit e azilit.

Në vend të kësaj, migrantët shprehen se dëshirojnë të vendosen në qytete të mëdha meksikane, ku mund të gjejnë punë dhe të dorëzojnë kërkesa për azil. Disa prej tyre thanë se nuk kanë marrë përgjigje për kërkesat e azilit në Tapachula, pavarësisht që kanë kaluar muaj në këtë qytet të vogël pranë kufirit me Guatemalën.

Jerry Gabriel, një migrant haitian 29-vjeçar, tha: “Shtetet e Bashkuara nuk janë më një opsion për ne. Ne duam vetëm të arrijmë në Meksiko City, Monterrey, Tijuana apo ndonjë vend tjetër ku mund të jetojmë”.

Në mars një grup tjetër prej disa qindra migrantësh u nis gjithashtu nga Tapachula, por karvani u shpërbë pas 12 ditësh në marshim, pasi migrantët bënë një marrëveshje me zyrtarët e emigracionit meksikan.

Gjatë administratës së kryetares Claudia Sheinbaum, e cila mori detyrën në tetor 2024, janë regjistruar 18 karvane migrantesh që kanë nisur nga Tapachula. Asnjë prej tyre nuk ka arritur më tej se shteti jugor meksikan Oaxaca.

Haitianët përbëjnë një të katërtën e kërkesave për azil në Meksikë. Sipas agjencisë kombëtare të refugjatëve në Meksikë, 127,000 haitianë kanë dorëzuar kërkesa për azil midis viteve 2020 dhe 2024.