Zëvendëskryeministri i Polonisë paralajmëron për mundësinë e një “operacioni flamuri i rremë” rus për të justifikuar një sulm ndaj një anëtari të NATO-s
Gdansk — Zëvendëskryeministri i Polonisë, Radek Sikorski, tha se nuk përjashton mundësinë që Rusia, brenda dy viteve të ardhshme, të inskenojë një “operacion flamuri i rremë” kundër territorit të saj për t’i dhënë një pretekst një sulmi ndaj një shteti anëtar të NATO-s. Ai theksoi nevojën që aleatët të jenë të qartë ndaj Moskës dhe të përgatisin një përgjigje të vendosur ndaj çdo provokimi.
Siç raporton CBS News, Sikorski u shpreh se duhet të komunikohet qartë me Presidentin Vladimir Putin që perëndimi e di planet e tij, se nuk do të mashtrohet dhe se çdo përpjekje e tillë do të konsiderohet e papranueshme, pasi NATO do të mbrojë çdo pëllëmbë të territorit të saj.
Sikorski vlerësoi se rezistenca e Ukrainës këtë vit ka ndryshuar pjesërisht rrjedhën e konfliktit. Ai tha se Ukraina ka fituar avantazhe në Detin e Zi, se Rusia nuk dominon hapësirën ajrore të vendit, dhe se forcat ukrainase kanë rikthyer kontrollin mbi një autostradë strategjike që lidh Donbasin me Krimenë. Sipas pretendimeve zyrtare ukrainase, forcat e Kievit kanë rimarrë më shumë se 230 milje katrore këtë vit, ndërsa sulmet ndaj infrastrukturës energjetike shtynë autoritetet ruse të ndërpresin shitjen e gazit për civilët në Krime.
Polonia vazhdon të luajë një rol kyç në furnizimin e Ukrainës; vlerësimet tregojnë se rreth 90% e ndihmave ushtarake të huaja për Kievin kalojnë përmes kufirit polako-ukrainas. Megjithatë, marrëdhënia midis dy vendeve është tensionuar kohët e fundit pas vendimit të Ukrainës për të ribaptizuar një njësit ushtarak me emrin e një milicie të Luftës së Dytë Botërore, një çështje që në Poloni lidhet me masakrën e Volhynisë të vitit 1943. Sikorski tha se fqinjët duhet të tejkalojnë këto mosmarrëveshje dhe të mos lejojnë që Moska të përfitojë nga ndarjet mes tyre. Ai gjithashtu preferoi që bisedimet e ardhshme të zhvillohen direkt midis Presidentit Volodymyr Zelenskyy dhe Presidentit Putin, pa ndërmjetësim, dhe përmendi se takimi i fundit ballë për ballë midis përfaqësuesve rusë dhe ukrainas u mbajt në shkurt në Emiratet e Bashkuara Arabe në praninë e ndërmjetësimit amerikan.
Sipas CBS News, Sikorski thekoi se evropianët nuk janë të neutralë ndaj këtij konflikti dhe se aleatët duhet të qëndrojnë të bashkuar për të parandaluar çdo lëvizje të Rusisë që do të cenonte sigurinë e NATO-s.
