Mbreti Charles nuk do të banojë në Pallatin Buckingham pas rinovimit 487 milionë dollarësh
Mbreti Charles III ka vendosur që, pas përfundimit të rinovimit prej 487 milionë dollarësh, të mos banojë në Pallatin Buckingham, duke thyer një traditë që daton gati dy shekuj. Pallati do të vazhdojë të shërbejë si qendër ceremoniale dhe operative e monarkisë, ndërsa mbreti dhe Mbretëresha Camilla do të vazhdojnë të kryejnë detyrat e tyre aty. Për pjesën tjetër të mbretërimit, ata do të qëndrojnë në Clarence House, që ndodhet pranë pallatit.
Sipas CBS News, vendimi u njoftua gjatë një breefingu mbi financat mbretërore, ku Mbreti u bë monarku i parë britanik që bëri publike shumën e tatimeve të paguara — 16.1 milionë dollarë në vitin financiar 2024–25, nga 15.4 milionë një vit më parë. Zyrtarët shpjeguan se qëndrimi në Clarence House do t’u mundësojë autoriteteve të hapin më shumë hapësira të Pallatit Buckingham për publikun, të organizojnë më shumë ngjarje dhe të rrisin numrin e tureve dhe vizitorëve. James Chalmers, zyrtari i lartë përgjegjës për çështjet financiare të mbretit, e përshkroi pallatin si “xhevahirin” e ndërtesave kombëtare dhe theksoi se ai do të vazhdojë të jetë selia kryesore e monarkisë.
Ndërtuar në vitet 1820, Pallati Buckingham ka qenë rezidenca londineze e çdo monarku britanik që nga Mbretëresha Victoria. Me 775 dhoma, pallati përfshin zyrat e administratës mbretërore dhe shërben për pritje shtetërore të nivelit të lartë. Ai është edhe vendqëndrimi për parakalime dhe ceremonitë publike që mbledhin turma nën ballkonin e tij, dhe aktualisht pret rreth 700,000 vizitorë në vit.
Që nga viti 2017 ka nisur një program dhjetëvjeçar për përmirësimin e infrastruktures së pallatit — ndërrimin e instalimeve të ujit, kabllove dhe sistemit të ngrohjes — me qëllim që ndërtesa të mbetet funksionale për dekadat e ardhshme; projekti pritet të përfundojë vitin e ardhshëm. Sipas raportimeve të CBS News, ky vendim synon të rrisë aksesin publik dhe shtrirjen e ngjarjeve në Pallatin Buckingham, ndërsa rezidenca e përditshme e mbretit dhe mbretëreshës do të mbetet Clarence House.
