Rrëzimi i dy mocioneve me debat/ Këlliçi: Mazhoranca po refuzon realitetin e protestave, investimet strategjike janë kthyer në privilegje klienteliste
Deputeti i Partisë Demokratike, Belind Këlliçi, ka mbajtur një fjalim në foltoren e Kuvendit pas rrëzimit në Konferencën e Kryetarëve të mocionit me debat, i cili lidhej me kërkesat e qytetarëve dhe mocionit me debat mbi rezolutën e Parlamentit Evropian për raportin e Komisionit Evropian për Shqipërinë për vitin 2025. Këlliçi u shpreh se prej 30 ditësh mijëra qytetarë po protestojnë çdo mbrëmje në kryeqytet, ndërsa sipas tij, kërkesa për një debat parlamentar është refuzuar nga mazhoranca. Ai shtoi se, sipas tij, shumica e provave dhe denoncimeve mbi situatën në vend vijnë nga qytetarët dhe individë që kanë qenë pranë kryeministrit Edi Rama.
“Prej 30 ditësh mijëra shqiptarë protestojnë çdo mbrëmje. Kërkuam mocion me debat, por mazhoranca e rrëzoi. Shumicën e provave i kanë shkruar njerëzit që kanë qenë më pranë Edi Ramës. Prej 30 ditësh qytetarët protestojnë kundër një modeli që e ka kthyer shtetin në pronë private, ku ligjet ndryshohen sipas porosisë së klientit, zonat e mbrojtura shihen si mundësi biznesi dhe ku investimet strategjike janë kthyer në privilegje strategjike të shpërndara me dorë jashtë çdo procedure ligjore”, tha ai.
Deputeti demokrat theksoi se kërkesa për debat parlamentar lidhet me nevojën, sipas tij, për të mos injoruar situatën jashtë Kuvendit.
“Ky Kuvend nuk mund të sillet sikur jashtë mureve s’po ndodh asgjë. Ju s’mund të refuzoni realitetin”, u shpreh Këlliçi.
Ai iu referua edhe rezolutës së miratuar më 17 qershor nga Parlamenti Evropian mbi raportin e Komisionit Evropian për Shqipërinë për vitin 2025, duke theksuar se ajo ka kërkuar ndryshime në legjislacionin për zonat e mbrojtura.
“Sipas tij, Parlamenti Evropian kërkoi shfuqizimin e ndryshimeve në ligjin e vitit 2024 për zonat e mbrojtura, ndërkohë që në këtë sallë ka heshtje”, deklaroi Këlliçi. Ai kritikoi gjithashtu mungesën e reagimit nga deputetët që kanë propozuar amendamentet ligjore, duke kërkuar përgjegjësi politike dhe reflektim mbi vendimet e marra.
