Presidenti i Federatës së Futbollit të Kosovës, Agim Ademi, ka zhvilluar një takim me talentin kosovar të futbollit, Arijon Ibrahimoviq, i cili është pjesë e Bayern Munichut.

Ademi ka publikuar një fotografi nga dreka e përbashkët me Ibrahimoviqin në Prizren, duke e vlerësuar lart talentin dhe karakterin e futbollistit 19-vjeçar.

“Përveçse një super futbollist me të ardhme të ndritur, Arijoni është edhe një djalë i edukuar, modest dhe krenar për rrënjët e tij, vlera këto që e bëjnë edhe më të veçantë”, ka shkruar Ademi.

Kreu i FFK-së i ka uruar Ibrahimoviqit suksese në karrierë, duke shprehur bindjen se ai do të ketë arritje të mëdha në të ardhmen, ndërsa ka falënderuar edhe familjen e tij për ruajtjen e lidhjes me Kosovën dhe vlerat e saj.

Megjithatë, një detaj në fotografinë e publikuar ka tërhequr vëmendjen. Ademi dhe Ibrahimoviqi kanë zgjedhur të fotografohen pranë një lokali ku në sfond shihet mbishkrimi “Coming Soon”, një detaj që jep shpresa se mund të mos ketë qenë një zgjedhje e rastësishme.

Kjo rrit gjasat që talenti i Bayern Munichut mund të jetë një nga prurjet e reja të mundshme për Kombëtaren e Kosovës. Megjithatë, presidenti i FFK-së nuk ka dhënë ndonjë detaj apo konfirmim lidhur me atë se fanellën e cilës kombëtare do ta veshë Ibrahimoviq.

Arijon Ibrahimoviq, i cili ka prejardhje kosovare, është pjesë e akademisë së Bayern Munichut dhe konsiderohet një nga talentet premtuese të futbollit gjerman. Ai ka përfaqësuar Gjermaninë në grupmoshat e reja, por mbetet i hapur diskutimi për zgjedhjen e tij në nivelin senior.