Warren Police organizon ceremoninë e parë të çmimeve të Komisionerit

Komuniteti është i ftuar të marrë pjesë në ceremoninë e parë të ndarjes së Çmimeve të Komisionerit, e organizuar nga Departamenti i Policisë së qytetit Warren, këtë të premte.

Aktiviteti do të zhvillohet në orën 10:00 paradite në Warren City Hall, në sallën e konferencave në katin e parë. Në ceremoni do të marrin pjesë Komisioneri i Policisë Eric Hawkins, Kryetarja e Bashkisë Lori Stone, si dhe drejtues të tjerë lokalë dhe pjesëtarë të departamentit.

Çmimet e Komisionerit janë rezultat i një procesi të detajuar vlerësimi mbi kontributin profesional të individëve. Bordi përzgjedhës përbëhet nga drejtues të departamentit dhe përfaqësues të komunitetit, të cilët kanë shqyrtuar kandidatët në disa kategori.

Komisioneri Eric Hawkins e cilësoi këtë ceremoni si një moment historik për Departamentin e Policisë së Warren.

“Kjo ceremoni inauguruese është një pikë kthese për departamentin tonë dhe entuziazmi është shumë i madh. Me këtë çmim të parë, ne po krijojmë një traditë prestigjioze që vlerëson një kontribut të qëndrueshëm profesional. Këto nuk janë thjesht çmime për një ditë pune, por përfaqësojnë arritjet më të larta profesionale dhe vendosin një standard të ri për çdo punonjës që mban uniformën tonë,” u shpreh Hawkins.

Gjatë ceremonisë do të shpallen finalistët dhe fituesit në katër kategori kryesore: Oficeri Drejtues i Vitit, Oficeri i Vitit, Dispeçeri i Vitit dhe Punonjësi Civil i Vitit.

Organizatorët theksojnë se aktiviteti synon jo vetëm të vlerësojë punën e punonjësve të policisë, por edhe të forcojë lidhjen mes departamentit dhe komunitetit që ai shërben.