LONDËR – Burnham zgjidhet lider i Partisë Laburiste, pritet të bëhet kryeministri i ardhshëm i BM-së

LONDËR, 17 korrik /ATSH-DPA/- Andy Burnham falënderoi kryeministrin në largim të Britanisë së Madhe, Keir Starmer duke deklaruar se është “gati të udhëheqë” vendin, menjëherë pasi u zgjodh lider i ri i Partisë Laburiste.

Me zgjedhjen në krye të laburistëve, Burnham pritet të marrë detyrën e kryeministrit të Britanisë së Madhe brenda pak ditësh.

“Ky është një moment krenarie për mua dhe familjen time, një moment shumë emocionues. Por, është gjithashtu një përgjegjësi. Jam gati të udhëheq dhe të ndërtoj mbi themelet që hodhi Keir Starmer”, tha Burnham.

Ai vlerësoi drejtimin e Starmer, duke theksuar se nën udhëheqjen e tij Partia Laburiste kaloi nga humbja më e rëndë në një nga fitoret më të mëdha në historinë e saj.

“Keir e riktheu Partinë Laburiste në pozicionin për të ndryshuar jetën e njerëzve dhe kjo është ajo që kemi bërë gjatë dy viteve të fundit”, theksoi Burnham.

Ish-kryebashkiaku i Mançesterit të Madh vlerësoi gjithashtu disa nga arritjet e qeverisë së Starmer, përfshirë zgjerimin e të drejtave të punonjësve dhe qiramarrësve, uljen e listave të pritjes në Shërbimin Kombëtar Shëndetësor (NHS), rikthimin e hekurudhave në pronësi publike dhe miratimin e Ligjit Hillsborough, të cilin e cilësoi si “ribalancimin më të madh të drejtësisë që ka parë ndonjëherë vendi”.

“Sot, falënderojmë Keir Starmer për shërbimin ndaj partisë sonë dhe vendit”, përfundoi Burnham. /