Novo Nordisk padit Eli Lillyn për reklama të gabuara mbi ilaçet GLP‑1
Novo Nordisk paditi Eli Lillyn, duke e akuzuar rivalen se ka shpërndarë reklama të gabuara që paraqesin barnat GLP‑1 të Lilly si më efektive se produktet e Novo Nordisk për humbje peshe dhe trajtimin e diabetit tip 2.
Sipas CBS News, Eli Lilly tha se reklamat e saj janë të vërteta, transparente dhe të bazuara në provat shkencore më të drejtpërdrejta, dhe se do t’i kundërshtojë me forcë akuzat. Padia pretendon se Lilly përdor të dhëna klinike të vjetruara për të krahasuar dozat më të larta të Zepbound dhe Mounjaro me doza më të ulëta të Wegovy dhe Ozempic, duke krijuar kështu një përshtypje të pasaktë për efikasitetin.
Dokumenti i dorëzuar në Gjykatën e Distriktit të SHBA-së në New Jersey thotë se Lilly nuk u bazua në informacionin më të fundit mbi dozat që miratoi Administrata e Ushqimit dhe Barnave, të cilat sipas Novo Nordisk sjellin humbje më të madhe të peshës dhe kontroll më të mirë të sheqerit në gjak. Kompania daneze po ashtu argumenton se Lilly tregon ekzistencën e një doze më të lartë të Wegovy-t vetëm në nota të vogla, të cilat padia i përshkruan si “të paqarta” dhe “pothuajse të padukshme”.
Kjo çështje shfaqet në një moment kur konkurenca për tregun e barnave të humbjes së peshës është në rritje: përdorimi i agonistëve GLP‑1 është rritur ndjeshëm vitet e fundit, dhe një studim i Gallup në qershor gjeti se 15% e të rriturve amerikanë kanë përdorur ndonjëherë këto ilaçe për humbje peshe, nga 12% një vit më parë. Sipas CBS News.
