Protesta në Mallorca, dhjetëra mijëra njerëz kundër turizmit masiv
Në ishullin spanjoll të Majorkës, dhjetëra mijëra njerëz dolën në rrugë për të protestuar kundër turizmit masiv, me përleshje midis demonstruesve dhe policisë.
Protestuesit fillimisht u mblodhën në mbrëmje në Plaza de Espana në qendër të Palmës, kryeqytetit të ishullit spanjoll në Ishujt Balearik. Nga atje, demonstrata marshoi nëpër qendër të qytetit deri në katedralen, ku u lexua manifesti i protestuesve më vonë gjatë mbrëmjes.
Iniciativa Menys Turisme, Mes Vida, “Më pak turizëm, më shumë jetë”, ka bërë thirrje për protesta në ishull, i cili është veçanërisht i popullarizuar tek turistët nga Gjermania dhe Mbretëria e Bashkuar, për të tretin vit radhazi.
Policia lokale vlerësoi se numri i protestuesve ishte 25,000.
Një zëdhënës i organizatorëve të aksionit u tha gazetarëve se, duke pasur parasysh që zgjedhjet rajonale në Ishujt Balearik do të mbahen pas një viti, ata donin të shprehnin mendimin e tyre.
Koha u zgjodh qëllimisht që të përkonte me sezonin aktual të festave. Fundi i korrikut dhe fillimi i gushtit konsiderohen javët me numrin më të lartë të pushuesve në Ishujt Balearik.
Protestuesit ankohen për mungesën e strehimit, trafikun e rënduar, për mbeturinat dhe zhurmat.
Kërkesa kryesore e pjesëmarrësve është kufizimi i numrit të vizitorëve në Majorkë. Pjesëmarrësit në mobilizim ia atribuojnë mungesën serioze të strehimit rritjes së numrit të pushuesve dhe shtëpive me qira. Organizatorët ankohen se shumë njerëz me të ardhura mesatare mezi mund të përballojnë një apartament në ishull.
Shoqatat e qytetarëve, grupet mjedisore dhe organizata të tjera i lidhin problemet si ndotja, mbingarkesa e trafikut dhe zhurma, si dhe shkatërrimi i mjedisit natyror, veçanërisht me turizmin masiv.
Këtë herë, gjatë protestës nuk u raportuan incidente të mëdha apo sulme me pistoleta uji kundër pushuesve, të ngjashme me ato që ndodhën në protestat e mëparshme në Barcelonë ose Madrid.
Megjithatë, ndodhën incidente midis protestuesve dhe policisë, me të lënduar nga të dyja palët.
