Humbi betejën për jetën, ndërron jetë 71-vjeçari i aksidentuar në aksin Lezhë–Milot

Ka ndërruar jetë në Spitalin e Traumës në Tiranë 71-vjeçari Preng Gjoka, i cili ishte plagosur rëndë në një aksident rrugor të ndodhur mëngjesin e 4 korrikut në aksin Lezhë–Milot.

I moshuari po lëvizte me biçikletë pranë kryqëzimit të Rriles, kur u përplas nga një automjet tip “Benz” me targa të Kosovës. Përplasja i shkaktoi dëmtime të rënda, ndërsa ai u transportua fillimisht në Spitalin Rajonal të Lezhës dhe më pas u dërgua me urgjencë në Spitalin e Traumës në Tiranë.

Pavarësisht trajtimit të specializuar dhe përpjekjeve të mjekëve, 71-vjeçari nuk mundi t’u mbijetojë plagëve të marra, duke ndërruar jetë pas disa javësh në spital.

Pas aksidentit, drejtuesi i automjetit u shoqërua dhe u ndalua nga Policia, ndërsa hetimet vijojnë për të zbardhur rrethanat e plota të ngjarjes dhe për të përcaktuar përgjegjësitë ligjore.