Zjarrfikësi vullnetar humb jetën në Florida, mbi 120 shtëpi të shkatërruara nga zjarret në Georgjia
Në veri të Floridës, një zjarrfikës vullnetar, James “Kevin” Crews, humbi jetën gjatë përpjekjeve për të shuar një zjarr në terren, sipas zyrës së sherifit të Qarkut Nassau. Ai pësoi një emergjencë mjekësore dhe ndërroi jetë në spital të enjten pasdite. Kreu i departamentit të zjarrfikësve vullnetarë në Hilliard e përshkroi Crews-in si një shembull të guximit dhe përkushtimit dhe vdekja e tij do të mbetet e paharruar.
Ndërkohë, në pjesën juglindore të Georgjias, dy zjarre të mëdha kanë shkatërruar më shumë se 120 shtëpi dhe mijëra të tjera janë në rrezik. Guvernatori i Georgjias, Brian Kemp, bëri me dije se 87 shtëpi janë shkatërruar në Qarkun Brantley, numri më i madh i shtëpive të dëmtuara nga një zjarr i vetëm në historinë e shtetit. Një tjetër zjarr më i madh po vazhdon të digjet në qarqet Clinch dhe Echols pranë kufirit me Floridën, duke përfshirë një sipërfaqe prej rreth 50 miljesh katrore, dyfishin e madhësisë së Manhatanit.
Kemp njoftoi se zjarri në Brantley ka nisur nga një balon prej folies që kontaktoi me rrjetin elektrik dhe shkaktoi flakën fillestare. Ndërsa zjarri më i madh dyshohet të ketë nisur nga ngrohja me saldim e një porte. Deri të premten, ky zjarr ishte 15% i kontrolluar dhe rreth 4,000 banesa ishin evakuuar për shkak të rrezikut.
Autoritetet thonë se kushtet e thata, era e fortë, ndryshimet klimatike dhe pemët e rrëzuara nga Uragani Helene qëndrojnë në bazë të rritjes së këtyre zjarreve në rajon. Qeveria federale dhe lokale vazhdojnë të punojnë për të mbrojtur banesat dhe për të krijuar zona të mbrojtura duke pastruar shkurre të thata dhe duke përdorur pajisje për ujitje intensive.
Fatkeqësisht, zjarret kanë shkaktuar dëm të konsiderueshëm në komunitete, me shumë familje që kanë humbur gjithçka. Disa banorë, si Michael Gibson nga Georgjia, janë detyruar të largohen nga shtëpitë e tyre dhe janë strehuar në kampingje ose banesa të afërmve, ndërsa të tjerë, si Jennifer Murphy, kanë pasur vetëm pak kohë për t’u evakuuar së bashku me kafshët e tyre.
Autoritetet kanë paralajmëruar se reshjet e shiut janë të domosdoshme për të ndalur përhapjen e zjarreve, por parashikimet tregojnë se reshjet që priten këtë fundjavë nuk do të jenë të mjaftueshme. Janë në pritje reshje më të mëdha gjatë verës, pasi tanimë komunitetet përballen me periudha të zgjatura thatësire.
